‘रणपति शिवराय स्वारी आग्रा’मध्ये चिन्मय मांडलेकर नाही तर ‘हा’ अभिनेता साकारणार छत्रपती शिवाजी महाराज
दिग्पाल लांजेकर दिग्दर्शित 'रणपती शिवराय स्वारी आग्रा' या चित्रपटात छत्रपती शिवाजी महाराजांची भूमिका कोण साकारणार, यावरून अखेर पडदा उचलण्यात आला आहे. यावेळी चिन्मय मांडलेकर नाही तर हा अभिनेता चित्रपटात महाराजांच्या भूमिकेत दिसणार आहे.
भव्य रंगमंच, दिलखेचक रोषणाई, मंत्रमुग्ध करणाऱ्या वातावरणाला ढोल ताशांच्या गजराची साथ हे सगळंच अगदी भारावून टाकणारं.. आणि अशातच भरजरी वस्त्र, शिरोभागी आकर्षक जिरेटोप, गळ्यात आभूषणांसह कवड्यांची माळ, कमरेला लटकणारी भवानी तलवार यांसह घोड्यावर स्वार झालेले साक्षात छत्रपती शिवाजी महाराज आणि त्यांचे पराक्रमी शिलेदार अवतरले आणि एकच जल्लोष झाला. निमित्त होतx ‘रणपति शिवराय स्वारी आग्रा’ या आगामी मराठी चित्रपटातील प्रसंगाच्या सादरीकरणाचं. शिवकालीन इतिहासाच्या पानांमध्ये अभिमानाने कोरलेला छत्रपती शिवाजी महाराज यांच्या ऐतिहासिक आग्रा भेटीचा अध्याय ‘रणपति शिवराय स्वारी आग्रा’ या भव्य चित्रपटातून प्रेक्षकांसमोर येणार आहे. दिग्पाल लांजेकर दिग्दर्शित ‘रणपति शिवराय स्वारी आग्रा’ हा चित्रपट येत्या 30 जानेवारीला प्रेक्षकांच्या भेटीला येणार आहे.
लेखक-दिग्दर्शक दिग्पाल लांजेकरच्या संकल्पनेतून उदयास आलेल्या शिवराज अष्टकातील हे सहावं पुष्प आहे. ‘रणपति शिवराय स्वारी आग्रा’ या चित्रपटातील छत्रपती शिवाजी महाराजांचं प्रथमदर्शन यावेळी उपस्थितांना अनुभवता आलं. या चित्रपटात छत्रपती शिवरायांच्या रूपात नव्या दमाचा उमदा अभिनेता अभिजीत श्वेतचंद्र दिसणार आहे. या चित्रपटातील ‘महारुद्र शिवराय’ गीताचं दमदार सादरीकरण यावेळी करण्यात आलं. दिग्पाल लांजेकर यांनी हे गीत लिहिलं असून अवधूत गांधी, अमिता घुगरी यांचा स्वरसाज गीताला लाभला आहे. अवधूत गांधी आणि मयूर राऊत यांचं संगीत गीताला लाभलं आहे.
View this post on Instagram
याआधी दिग्पाल लांजेकरांच्या शिवराज अष्टकातील चित्रपटांमध्ये अभिनेता चिन्मय मांडलेकर छत्रपती शिवाजी महाराजांची भूमिका साकारत होता. परंतु मुलाच्या नावावरून झालेल्या वादानंतर चिन्मयने यापुढे महाराजांची भूमिका साकारणार नसल्याचा निर्णय केला होता. म्हणूनच या भागात चिन्मयऐवजी अभिजीत श्वेतचंद्र महाराजांच्या भूमिकेत आहे.
छत्रपती शिवाजी महाराजांच्या आयुष्यात घडलेल्या घटना अनेक पिढ्यांसाठी प्रेरणादायी आणि रोमांचित करणाऱ्या आहेत. शिवाजी महाराजांची आग्रा भेट ही एक अत्यंत जोखमीची घटना होती. या भेटीतून त्यांच्या नेतृत्वाची, कर्तृत्वाची खरी झलक दिसली. महाराजांचं शौर्य आणि धोरणात्मक रणनीती या चित्रपटातून पहायला मिळणार आहे. ‘रणपति शिवराय स्वारी आग्रा’ या भव्य चित्रपटाचं लेखन-दिग्दर्शन दिग्पाल लांजेकर यांचं आहे.
