एकेकाळी चित्रपटांमध्ये काम करणाऱ्या अभिनेत्रीची झाली अशी दुर्दशा; ओळखलंत का तुम्ही?
सोशल मीडियावर शीला नावाच्या एका अनाथ महिलेचा व्हिडीओ व्हायरल झाला. ही महिला एकेकाळी चित्रपटसृष्टीत काम करायची असा, दावा केला जात होता. परंतु आज तिची अशी अवस्था पाहून पोलिसांनी तिला अनाथाश्रमात पाठवलं. सहा महिन्यांनंतर तिचं पूर्ण आयुष्य बदललं आहे.
कलाविश्वात आणि ग्लॅमरच्या दुनियेत कधी कोणाचं आयुष्य बदलून जाईल, हे सांगता येत नाही. इथे रातोरात सर्वसामान्य माणूस स्टार बनतो आणि एका क्षणात एखाद्या स्टारचं सर्वकाही हिरावून जातं. फिल्म इंडस्ट्रीतील असे अनेक कलाकार आहेत, ज्यांना कामाची गरज तर आहे, पण त्यांना काम मिळत नाहीये. काही जणांचं आयुष्य इतकं बदललंय, की त्यांना आज कोणी ओळखूही शकत नाही. सध्या सोशल मीडियावर शीला नावाच्या एका महिलेचा व्हिडीओ व्हायरल होत आहे. यामध्ये तिने दावा केला की एकेकाळी ती फिल्म इंडस्ट्रीत काम करत होती. परंतु आज त्याच महिलेला लोक ‘पागल’ म्हणत आहेत.
तनुज मिश्रा नावाच्या एका व्यक्तीने त्याच्या इन्स्टाग्रामवर हा व्हिडीओ शेअर केला आहे. यामध्ये एक महिला भीक मागून आयुष्याचा गाडा कसाबसा ढकलत असल्याचं पहायला मिळतंय. तिच्या अंगावरील कपडे फाटलेले आहेत, तिच्या केसांची अवस्था वाईट झाली आहे. अत्यंत हलाखीच्या परिस्थितीत जगणाऱ्या या महिलेनं सांगितलं की, एकेकाळी ती चित्रपटांमध्ये काम करायची. संबंधित महिलेनं तिचं नाव शीला असल्याचं म्हटलंय. “माझं नाव शीला आहे आणि मी चित्रपटांमध्ये काम केलंय. मी अनाथ आहे, माझं इथे कोणीच नाही, माझ्याकडे राहायला घरही नाही. आता माझ्या मृत्यूची वेळ आली आहे”, असं ती म्हणते. अखेर पोलिसांनी तिची मदत केली असून तिला अनाथ आश्रमात पोहोचवलं. सहा महिन्यांनंतर तिचं आयुष्य पूर्णपणे बदललं आहे.
View this post on Instagram
सहा महिन्यांच्या ट्रान्सफॉर्मेशननंतर ही महिला स्वच्छ कपड्यांमध्ये आणि नीटनेटक्या अवतारात दिसत आहे. इतकंच नाही तर टेलिव्हिजन इंडस्ट्रीतील प्रसिद्ध अभिनेत्री शिल्पा शिंदेनं तिच्यासोबत डान्सचा व्हिडीओ पोस्ट करत सोशल मीडियावर चर्चा घडवून आणली आहे. अनेकांनी शिल्पा शिंदेचंही कौतुक केलं आहे. ‘शिल्पा तू खरंच चांगली व्यक्ती आहेस’, असं एकाने लिहिलं. तर ‘शिल्पाने अशा अनेकांची मदत केली आहे’, असं दुसऱ्या युजरने म्हटलंय. शिल्पाचा हा व्हिडीओ सोशल मीडियावर चांगलाच व्हायरल होत आहे.
