IMDb रेटिंग 8.1 असणाऱ्या या चित्रपटाला मिळणार 3 नॅशनल अवॉर्ड, OTT वर पाहण्यासाठी तुफान गर्दी

एखादा चित्रपट संपल्यानंतरही त्याची कथा बराच काळ मनात आणि डोक्यात घर करून राहते. अशाच चित्रपटांपैकी एक म्हणजे दाक्षिणात्य अभिनेता शिवकार्तिकेयन आणि अभिनेत्री साई पल्लवी यांची प्रमुख भूमिका असलेला ‘अमरन’. भारतीय लष्करातील शहीद मेजर मुकुंद वरदराजन यांच्या आयुष्यावर आधारित या चित्रपटाने प्रेक्षकांच्या मनावर विशेष छाप पाडली आहे. IMDb वर या चित्रपटाला 8.1 रेटिंग मिळाले आहे.

‘अमरन’ हा तमिळ चित्रपट भारतीय सैन्यातील शहीद मेजर मुकुंद वरदराजन यांच्या शौर्य, कर्तव्यनिष्ठा आणि बलिदानाची सत्यकथा मांडतो. चित्रपटात शिवकार्तिकेयन यांनी मेजर मुकुंद यांची भूमिका साकारली आहे, तर साई पल्लवीने त्यांच्या पत्नी इंदू रेबेका वर्गीस यांची भूमिका साकारली आहे.

दिग्दर्शक राजकुमार पेरियासामी यांनी केवळ मेजर मुकुंद यांच्या काश्मीरमधील दहशतवादविरोधी मोहिमांवर लक्ष केंद्रित केलेले नाही, तर त्यांच्या वैयक्तिक आयुष्यालाही तितकेच महत्त्व दिले आहे. प्रेम, लग्न, कुटुंब आणि देशसेवेची जबाबदारी यांचा सुंदर मेळ या चित्रपटात पाहायला मिळतो.

साई पल्लवीच्या अभिनयाने जिंकले मन

चित्रपटातील इंदू हे पात्र अत्यंत महत्त्वाचे आहे. मेजर मुकुंद यांच्या आयुष्यातील आनंद, चिंता, प्रेम आणि त्यांच्या शहादतीनंतरचा असह्य दुःखद काळ साई पल्लवी यांनी अत्यंत सहजपणे साकारला आहे. विशेषतः पतीच्या निधनानंतर त्यांच्या पात्राच्या भावनांमधून कुटुंबावर होणाऱ्या त्यागाची आणि वेदनेची जाणीव होते.

काही ठिकाणी जाणवतो संथ वेग

‘अमरन’ची लांबी जवळपास 2 तास 49 मिनिटे आहे. त्यामुळे काही प्रसंगांमध्ये चित्रपटाचा वेग थोडा संथ वाटू शकतो. विशेषतः दुसऱ्या भागात कथा काही ठिकाणी लांबलेली जाणवते. मेजर मुकुंद यांच्या खऱ्या आयुष्यावर आधारित कथा असल्यामुळे प्रेक्षकांना त्यांच्या जीवनातील प्रमुख घटना आधीच माहीत असल्यास मोठ्या ट्विस्टची अपेक्षा ठेवता येत नाही.

तसेच चित्रपटातील विरोधी पात्रांना फारसा विस्तार दिलेला नाही. मात्र या मर्यादा असूनही मेजर मुकुंद आणि इंदू यांची भावनिक कथा, शिवकार्तिकेयन आणि साई पल्लवी यांचा अभिनय आणि प्रभावी संगीत यामुळे ‘अमरन’ हा OTT वर पाहण्यासारखा चित्रपट ठरतो.