Bigg Boss OTT 2 | “लोक मला दारुडी म्हणायचे”; व्यसनाबाबत पूजा भट्टने केला खुलासा
सायरस ब्रोचा आणि घरातील इतर स्पर्धकांसोबत गप्पा मारताना पूजा म्हणाली, "मला दारुचं व्यसन होतं. ही बाब मी स्वत: स्वीकारली आणि त्यातून बाहेर पडण्यासाठीही प्रयत्न केले. अखेर वयाच्या 44 व्या वर्षी मला त्यातून बाहेर पडता आलं."
मुंबई : सलमान खान सूत्रसंचालन करत असलेला ‘बिग बॉस ओटीटी’चा दुसरा सिझन 17 जूनपासून सुरू झाला. या दुसऱ्या सिझनमध्ये टीव्ही स्टार्सपासून, सोशल मीडिया इन्फ्लुएन्सर्सपर्यंत बऱ्याच सेलिब्रिटींनी भाग घेतला आहे. प्रीमिअर एपिसोडपासूनच या शोने प्रेक्षकांचं लक्ष वेधलं आहे. या पहिल्या एपिसोडमध्येच अभिनेत्री पूजा भट्टने तिच्या खासगी आयुष्याविषयी खुलासा केला. वयाच्या 44 व्या वर्षी दारुच्या व्यसनातून बाहेर पडण्याला यश मिळालं, असं तिने सांगितलं. “मला दारुचं खूप व्यसन होतं”, ही बाब तिने सर्वांसमोर स्वीकारली.
“मला दारुचं व्यसन होतं”
सायरस ब्रोचा आणि घरातील इतर स्पर्धकांसोबत गप्पा मारताना पूजा म्हणाली, “मला दारुचं व्यसन होतं. ही बाब मी स्वत: स्वीकारली आणि त्यातून बाहेर पडण्यासाठीही प्रयत्न केले. अखेर वयाच्या 44 व्या वर्षी मला त्यातून बाहेर पडता आलं. समाजाने पुरुषांना जणू लायसन्सचं दिला आहे आणि त्यामुळे फक्त तेच दारुच्या व्यसनाबद्दल बोलताना दिसतात. पण महिला पुरुषांप्रमाणे खुलेपणानं मद्यपान करत नाहीत आणि त्यामुळेच त्यांना व्यसनातून बाहेर पडायलाही कठीण जातं. मी सर्वांसमोर मद्यपान करायचे, त्यामुळे त्यातून बाहेर पडण्यासाठी प्रयत्नसुद्धा सर्वांसमोरच केले.”
“लोक मला दारुडी म्हणायचे”
“लोक मला दारुडी म्हणायचे. तेव्हा मी त्यांना सांगायचे की मी दारुच्या व्यसनातून बाहेर पडतेय”, असं तिने पुढे सांगितलं. वयाच्या 44 व्या वर्षी दारुच्या व्यसनातून बाहेर पडल्याचा खुलासा पूजा भट्टने या शोमध्ये केला. बिग बॉस ओटीटी 2 च्या प्रीमिअर एपिसोडमध्ये दिबांग, अजय जडेजा, सनी लिओनी, पूजा भट्ट, मुकेश छाबडा, एमसी स्टॅन यांच्यासह बरेच सेलिब्रिटी पॅनलिस्टच्या रुपात दिसले. तर बिग बॉसच्या घरात सहभागी झालेल्या 13 स्पर्धकांमध्ये अविनाश सचदेव, पलक पुरसवानी, बेबिका धुर्वे, जिया शंकर, आलिया सिद्दिकी, फलक नाज, आकांक्षा पुरी, जद हदिद, सायरल ब्रोचा, मनिषा राणी, अभिषेक मल्हान, पुनीत सुपरस्टार यांचा समावेश आहे.
