कॉल करायची ही काय वेळ? प्रिती झिंटावर चिडलेला सनी देओल; बिग बींसमोरच पोलखोल
कौन बनेगा करोडपती या शोच्या एपिसोडमध्ये अभिनेत्री प्रिती झिंटाने हा किस्सा सांगितला. रात्री उशिरा फोन केल्यानंतर सनीने तिला थेट विचारलं, "एखाद्याच्या घरी कॉल करायची ही काही वेळ आहे का?"
अभिनेता सनी देओल ‘अँग्री यंग मॅन’ म्हणूनही ओळखला जातो. सनीच्या तापट स्वभावामुळे इंडस्ट्रीतील अनेक कलाकार त्याला घाबरतात. अभिनेत्री प्रिती झिंटाने सनीच्या रागाचा असाच एक किस्सा सांगितला आहे. अमिताभ बच्चन यांच्या ‘कौन बनेगा करोडपती’ या शोमध्ये प्रिती आणि सनी देओल एकत्र उपस्थित होते. या सिझनची धमाकेदार सुरुवात झाली. पहिल्याच एपिसोडमध्ये आमिर खान, सनी देओल आणि प्रिती झिंटा यांसारखे कलाकार पाहुणे म्हणून शोमध्ये पोहोचले होते. याच एपिसोडमध्ये प्रितीने सनी देओलच्या रागाचा हा किस्सा बिग बींसमोर सर्वांना सांगितला. सनी आणि बॉबी देओल यांच्यात काय फरत आहे, असा प्रश्न प्रितीला विचारण्यात आला होता. कारण तिने या दोन्ही देओल भावंडांसोबत चित्रपटांमध्ये काम केलं आहे.
सनी देओलचा किस्सा सांगताना प्रिती म्हणाली, “सनी आणि बॉबी दोघं पूर्णपणे वेगळे आहेत. बॉबी माझा मित्र आहे. मी त्याला तेव्हापासून ओळखते, जेव्हा आम्ही दोघांनीही चित्रपटसृष्टीत पदार्पण केलं नव्हतं. बॉबीकडे एक व्हॅन असायची आणि त्याच व्हॅनमधून तो बाहेर फिरायला जायचा. एकेदिवशी मी माझ्या सर्व मित्रमैत्रिणींसोबत बाहेर गेली होती. आम्ही सर्वांनी मिळून बॉबीला फोन करून त्याच्याकडे भेटायला येणार असल्याचं कळवणार होतो. त्याला फोन करण्याची जबाबदारी अखेर मलाच देण्यात आली होती. त्यावेळी मोबाइल फोन नव्हता, लँडलाइनवर कॉल लावले जात होते.”
“मी बॉबी देओलच्या घरातील लँडलाइनवर फोन केला. तेव्हा मला याची कल्पनाच नव्हती की याचा (सनी देओल) ढाई किलोचा हात माझा कॉल उचलणार. मी त्याला विचारलं की, हॅलो.. मी बॉबीशी बोलू शकते का? कदाचित त्यावेळी रात्रीचे 10.30 किंवा 11 वाजले असतील. सनी मला रागातच म्हणाला, एखाद्याच्या घरी कॉल करण्याची ही वेळ आहे का? हे ऐकून मी इतकी घाबरली आणि लगेच फोन ठेवला”, असं प्रिती सांगताच बिग बींसह सेटवरील सर्वजण हसू लागतात.
सनी देओलसोबत चित्रपटांमध्ये काम करण्यास सुरुवात केल्यानंतरही त्याची खूप भीती वाटत असल्याची प्रामाणिक कबुली तिने दिली. दोन-तीन चित्रपटांनंतर ही भीती हळूहळू कमी होत गेली, असं तिने सांगितलं. प्रितीने हा किस्सा सांगितल्यानंतर सनीने त्याची बाजू मांडली. “आमच्या घरातील नियम कडक होते. आम्हाला रात्री 8 वाजल्यानंतर बाहेर जायची परवानगी नव्हती. त्यादिवशी रात्रीचे 10.30 वाजले होते. मी बॉबीला माझ्या मुलासारखाच मानतो. त्यामुळे शिस्तीच्या बाबतीत मी त्याच्यासोबतही खूप कठोर राहिलो. तरीसुद्धा माझी नजर चुकवत तो इथे तिथे फिरायला जायचाच”, असं सनीने सांगितलं.
