सिंहगडाच्या पायथ्याशी नाना पाटेकरांनी का फार्महाऊस बांधलं? शोकसभेत पुरुषोत्तम बेर्डेंनी सांगितलं कारण

ज्येष्ठ अभिनेते नाना पाटेकर यांच्या निधनानंतर चित्रपटसृष्टीतून शोक व्यक्त केला जात आहे. नानांच्या आठवणींना उजाळा देण्यासाठी मुंबईत आयोजित शोकसभेत दिग्दर्शक पुरुषोत्तम बेर्डे यांनी त्यांच्यासोबतच्या काही खास आठवणी सांगितल्या. यावेळी नानांनी सिंहगडाच्या पायथ्याशी फार्महाऊस का बांधले आणि स्वतःच्या अंत्यविधीबाबत काय सांगितले होते, याचा भावुक करणारा खुलासाही त्यांनी केला.

पुरुषोत्तम बेर्डे यांनी सांगितले की, त्यांनी नाना पाटेकर यांचा प्रवास अगदी रंगभूमीपासून पाहिला आहे. नानांना अभिनयासोबतच स्केचिंगचीही आवड होती. सामाजिक कार्यातही त्यांनी मोठे योगदान दिले. काही दिवसांपूर्वी बेर्डे यांचे पुस्तक प्रकाशित झाल्यानंतर दोघांचे फोनवर जवळपास पाऊण तास बोलणे झाले होते. त्यानंतर ते नानांच्या शेतावर त्यांना भेटायला गेले होते.

नानांच्या फार्महाऊसवर एक मोठे तळे, विहीर, बैलगाड्या, गायी आणि वाडा असल्याचे बेर्डे यांनी सांगितले. तिथे सुमारे 350 कोंबड्याही होत्या. विशेष म्हणजे, नाना त्यांना सांभाळत होते; मात्र त्यांना कधीही हात लावला नव्हता, अशी आठवण त्यांनी सांगितली.

‘माझा अंत्यविधी इथेच करा’, नानांचे ते शब्द!

फार्महाऊसवर फिरत असताना नानांनी एका विशिष्ट जागेकडे बोट दाखवून तिथे आपला अंत्यविधी करण्यास सांगितले असल्याचे बेर्डे यांनी सांगितले. आजूबाजूची झाडेही त्यासाठी वापरण्याबाबत नानांनी सूचना दिल्या होत्या. त्यामुळे नानांच्या निधनाची बातमी समजल्यानंतर त्यांच्या अंत्यविधीची जागा कुठे असेल, याची चौकशी करण्याची गरजच पडली नाही, असे बेर्डे भावुक होत म्हणाले.

नानांना आयुष्याचा शेवट रुग्णालयात किंवा दीर्घ आजारपणात घालवायचा नव्हता. आपल्या शेवटाबाबतही त्यांनी आधीच विचार केला होता, असे बेर्डे यांनी नमूद केले.

सिंहगडाच्या पायथ्याशी फार्महाऊस का बांधले?

नानांचे फार्महाऊस पुण्यापासून सुमारे 35 किलोमीटर अंतरावर सिंहगडाच्या पायथ्याशी आहे. एवढ्या आतल्या भागात फार्महाऊस का बांधले असे बेर्डे यांनी नानांना विचारले होते. त्यावर सिंहगडाच्या परिसराशी असलेले भावनिक नाते सांगताना नानांनी, याच भागातून छत्रपती शिवाजी महाराजांचे मावळे एकेकाळी गेले असतील असे म्हटले होते.

फार्महाऊसच्या बाहेर पडल्यावर सिंहगडाचे दर्शन होत असल्याचा नानांना विशेष अभिमान होता असेही बेर्डे यांनी सांगितले. नानांनी आपल्या आयुष्याचा आणि शेवटाचाही विचार अतिशय शांतपणे केला होता या आठवणी सांगताना पुरुषोत्तम बेर्डे भावुक झाले.