Rakhi Sawant: देशातील सर्वांत श्रीमंत व्यक्ती करतेय राखी सावंतच्या आईची मदत; उचलला उपचाराचा खर्च
राखी सावंतच्या आईला आधीच कॅन्सर होता. त्यानंतर आता त्यांना ब्रेन ट्युमरसुद्धा झाला आहे. काही दिवसांपूर्वीच राखीचा रुग्णालयातून रडतानाचा व्हिडीओ सोशल मीडियावर व्हायरल झाला होता.
मुंबई: ड्रामा क्वीन म्हणून ओळखली जाणाऱ्या राखी सावंतच्या खासगी आयुष्यात सध्या बऱ्याच समस्या निर्माण झाल्या आहेत. एकीकडे तिच्या लग्नावरून तणाव असताना दुसरीकडे तिच्या आईची प्रकृती खालावली आहे. राखी सावंतच्या आईला आधीच कॅन्सर होता. त्यानंतर आता त्यांना ब्रेन ट्युमरसुद्धा झाला आहे. काही दिवसांपूर्वीच राखीचा रुग्णालयातून रडतानाचा व्हिडीओ सोशल मीडियावर व्हायरल झाला होता. राखीची आई सध्या रुग्णालयातच असून त्यांच्यावर उपचार सुरू आहेत. याआधी सलमान खाननेही तिची आर्थिक मदत केली होती. आता देशातील सर्वांत श्रीमंत व्यक्तीने आईच्या उपचारासाठी मदतीचा हात पुढे केल्याचं कळतंय.
“माझी आई लोकांना ओळखू शकत नाहीये. ती खाऊ-पिऊही शकत नाहीये. तिला अर्धांगवायूचा झटका आला होता. मी मुकेश अंबानी यांचे आभार मानते. कारण त्यांनी आईच्या उपचारासाठी माझी मोठी मदत केली. आईच्या उपचाराचा खर्चसुद्धा त्यांनी कमी केला आहे”, असं राखीने सांगितलं.
View this post on Instagram
राखीच्या आईला दोन महिन्यांसाठी रुग्णालयात दाखल करण्यात आलं आहे. तिचा व्हिडीओ समोर येताच चाहत्यांनी तिच्या आईच्या प्रकृतीसाठी प्रार्थना केली आहे. गेल्या काही दिवसांपासून राखी बिग बॉसच्या घरात होती. ग्रँड फिनाले पार पडल्यानंतर राखीने सर्वात आधी तिच्या आईची भेट घेतली. “घरी आल्यावर मला समजलं की आईची तब्येत बरी नाही. आम्ही आता रुग्णालयात आहोत. आईला कॅन्सर आहे आणि आता ब्रेन ट्युमरचंही निदान झालं आहे. तुम्ही कृपया त्यांच्यासाठी प्रार्थना करा. माझ्या आईला प्रार्थनेची फार गरज आहे”, असं म्हणत ती ढसाढसा रडली होती.
गायिका अफसाना खान, अभिनेत्री महिमा चौधरी, सोफिया हयात यांनी कमेंट करत राखीच्या आईच्या प्रकृतीसाठी प्रार्थना केली. राखीच्या अनेक चाहत्यांनीही तिला खचून न जाण्याचं आवाहन केलं. याआधी राखी बिग बॉसच्या 14 व्या पर्वात दिसली होती. या शोमधून मिळालेल्या पैशांनी आईच्या कॅन्सरवर उपचार करणार असल्याचं तिने सांगितलं होतं.
