करिअरमध्ये दिले फक्त 2 चित्रपट, दोन्ही ठरले फ्लॉप, तरीही 8533 कोटींचा मालक आहे हा अभिनेता
बॉलिवूडमधील या अभिनेत्याने दिले फक्त दोन चित्रपट. दोन्ही प्रदर्शित होताच ठरले फ्लॉप. तरी देखील तो आहे 8533 कोटी रुपयांचा मालक.
Bollywood Actor : बॉलिवूडमध्ये दरवर्षी अनेक जण हिरो होण्याचं स्वप्न घेऊन येतात. मात्र प्रत्येकाचं स्वप्न पूर्ण होतंच असं नाही. काही जण वर्षानुवर्षे संघर्ष करतात तर काही जण लवकरच वेगळा मार्ग निवडतात. अशाच एका अभिनेत्याचं नाव चर्चेत आलं आहे. तो अभिनेता म्हणजे गिरीश कुमार.
गिरीश कुमारने 2013 साली ‘रमैया वस्तावैया’ या चित्रपटातून बॉलिवूडमध्ये पदार्पण केले. या चित्रपटात त्याच्यासोबत श्रुति हासन आणि सोनू सूद प्रमुख भूमिकेत होते. मोठ्या बॅनरची साथ असूनही हा चित्रपट बॉक्स ऑफिसवर अपेक्षित यश मिळवू शकला नाही.
यानंतर गिरीशने पुन्हा एकदा नशीब आजमावत लवशुदा हा चित्रपट केला; मात्र हा चित्रपटही फ्लॉप ठरला. सलग दोन अपयशांनंतर गिरीशने अभिनय क्षेत्राला अलविदा करण्याचा निर्णय घेतला.
इंडस्ट्रीमध्ये महत्त्वाची जबाबदारी
गिरीश कुमार हा प्रसिद्ध निर्माता रमेश तौरानी यांचा मुलगा आहे. रमेश तौरानी हे टिप्स इंडस्ट्रीज या मोठ्या मनोरंजन कंपनीचे मालक आहेत. अभिनय सोडल्यानंतर गिरीशने वडील आणि काकांसोबत कौटुंबिक व्यवसायात प्रवेश केला.
आज गिरीश कंपनीमध्ये चीफ ऑपरेटिंग ऑफिसर (COO) या पदावर कार्यरत आहे. चित्रपट निर्मिती, वितरण आणि संगीत क्षेत्रातील अनेक महत्त्वाचे निर्णय तो घेतो. त्याच्या नेतृत्वाखाली कंपनीने अनेक मोठ्या स्टार्सचे चित्रपट आणि संगीत प्रकल्प हाताळले जातात. काही अहवालांनुसार, गिरीश सध्या सुमारे 8533 कोटी रुपयांच्या व्यवसायाशी निगडित आहेत.
वैयक्तिक आयुष्यही चर्चेत
गिरीश कुमारचा लूकही आता पूर्णपणे बदलला आहे. विविध कार्यक्रमांमध्ये तो क्वचितच दिसतो आणि त्याचा बदललेला अंदाज पाहून चाहते आश्चर्यचकित होतात. वैयक्तिक आयुष्याबाबत बोलताना गिरीशने एका मुलाखतीत सांगितले की त्याने बालमैत्रीण कृष्णासोबत 2007 पासून डेटिंग सुरू केले होते. ते दोघे किशोरवयीन असताना त्यांना नातं गंभीर असल्याची जाणीव झाली. मात्र, नवीन अभिनेता असल्याने आणि चित्रपटांच्या यशावर वैयक्तिक आयुष्याचा परिणाम होऊ नये म्हणून त्यांनी लग्नाची गोष्ट वर्षभर गुप्त ठेवली होती.
अभिनय क्षेत्रात अपेक्षित यश न मिळालं तरी गिरीश कुमारने कौटुंबिक व्यवसायात स्वतःची वेगळी ओळख निर्माण केली आहे. दोन फ्लॉप चित्रपटांनंतरही त्याने निराश न होता व्यवसायात मोठं स्थान मिळवलं आणि हेच त्याच्या यशाचं खऱ्या अर्थाने उदाहरण ठरलं आहे.
