Sachin Pilgaonkar : तो मला म्हणाला, तूला क्रिकेट जमणार नाही, तुझं काम कर…सचिन पिळगांवकरांनी सांगितला सुप्रसिद्ध क्रिकेटपटूचा किस्सा
Sachin Pilgaonkar : सचिन पिळगांवकर यांनी नुकत्याच एका मुलाखतीत सुप्रसिद्ध क्रिकेटपटूचा किस्सा सांगितला आहे.
सुप्रसिद्ध मराठी अभिनेते सचिन पिळगांवकर त्यांच्या प्रोफेशनल आयुष्यासोबतच वक्तव्यांमुळेही चर्चेत असतात. सचिन पिळगांवकर यांनी बालकलाकार म्हणून इंडस्ट्रीत पदार्पण केलं असून त्यांनी अनेक गाजलेल्या सिनेमांमध्ये काम केलं आहे. इंडस्ट्रीमध्ये अनेक वर्ष काम केल्यामुळे सचिन पिळगांवकर यांचा अनुभव दांडगा आहे. त्यामुळे मुलाखतींमध्ये ते आपले अनुभव शेअर करतात. अशातच आता एका मुलाखतीत सचिन पिळगांवकर यांनी एका सुप्रसिद्ध क्रिकेटपटूचा किस्सा सांगितला आहे.
सचिन पिळगांवकर यांनी सांगितला किस्सा
सचिन पिळगांवकर म्हणाले की, ‘मी बालकलाकार म्हणून प्रसिद्ध होतो, तेव्हा एक माझ्याच वयाचा मुलगा माझ्या घरी आला, आम्ही खूप गप्पा मारल्या. तो म्हणाला, चल क्रिकेट खेळू. मला क्रिकेट येत नाही असं मी त्याला सांगितलं. पण, तेव्हा मी शिकवतो तुला असं तो म्हणाला. मी बॅट हातात घेतली पण मला ते काही जमलं नाही. मी माझं बेस्ट देण्याचा प्रयत्न केला तरी मला क्रिकेट खेळता आलं नाही. शेवटी तीन ते साडेतीन महिन्यानंतर तोच मला म्हणाला की, ‘जाऊदे तूला क्रिकेट जमणार नाही, तू तुझं काम कर…’ मग मी माझा चालू ठेवला. मी अभिनेता बनलो आणि तो मुलगा संदीप पाटील बनला!’ ‘मराठी चित्रसृष्टी‘ला दिलेल्या मुलाखतीत सचिन पिळगांवकर बोलत होते.
दरम्यान, सचिन पिळगांवकर यांच्या कामाबद्दल सांगायचं तर सध्या ते ‘कापूसकोंडा‘ या सिनेमामुळे चर्चेत आहेत. पॅनोरामा स्टुडिओस प्रस्तुत व्हीपी माऊली ग्रुप ऑफ कंपनीज सह स्टोरीवाला फिल्म हा चित्रपट सादर करीत असून जास्वंद एंटरटेन्मेंट्स प्रा.लि. नं ‘कापूसकोंडा’ या चित्रपटाची निर्मिती केली आहे. ‘कापूसकोंडा’ चित्रपटाचे लेखन आणि दिग्दर्शन सचिन मोहिते यांचं आहे. सचिन मोहिते, गणेश पंडित, ऋषिकेश तुरई यांनी चित्रपटाची पटकथा, संवादलेखन केलं आहे. सचिन पाटेकर यांनी छायांकनाची जबाबदारी निभावली आहे. गाणी संगीतकार ए. व्ही. प्रफुल्लचंद्र यांनी सुरबद्ध केली आहेत, तर पार्श्वसंगीत अभिजीत हेगडेपाटील या चित्रपटाला लाभले आहे.
चित्रपटाच्या गाण्यांना गायक अवधूत गुप्ते, पद्मनाभ गायकवाड यांचा स्वरसाज लाभला आहे. सुहास राणे यांनी ध्वनी तंत्रज्ञ म्हणून काम पाहिले आहे. अभिनेते सचिन पिळगांवकर, अभिनेत्री मधुराणी गोखले यांच्यासह नवीन पिढीतील अभिनेत्री अक्षता पाडगांवकर, जान्हवी तांबट आणि अभिनेता भूषण पाटील अशी उत्तम स्टारकास्ट या चित्रपटात पहायला मिळणार आहे.
