सई-सिद्धार्थच्या आगळ्या-वेगळ्या लव्हस्टोरीनं वाढवली उत्सुकता; पहा ‘श्रीदेवी प्रसन्न’चा टीझर

मुंबई : 4 जानेवारी 2024 | लग्न का करावं? कुणाशी करावं? याची प्रत्येकाची आपली अशी कारणं आणि कल्पना असतात. ‘श्रीदेवी प्रसन्न’ या आगामी चित्रपटात लग्नासाठी योग्य जोडीदार शोधणाऱ्या श्रीदेवी-प्रसन्न या दोघांची कहाणी दाखवण्यात येणार आहे. टीप्स मराठीचा हा पहिला वहिला मराठी चित्रपट आहे. मराठीसोबतच बॉलिवूडमध्येही आपल्या अभिनयाचा ठसा उमटवलेली अभिनेत्री सई ताम्हणकर आणि मराठीतला आघाडीचा अभिनेता म्हणून ओळखला जाणारा हँडसम हंक सिद्धार्थ चांदेकर पहिल्यांदाच एकत्र मोठ्या पडद्यावर दिसणार आहेत. ही नवीकोरी आणि फ्रेश जोडी प्रेक्षकांना खूपच आवडली आहे. या चित्रपटाचा टीझर नुकताच प्रदर्शित करण्यात आला असून त्यावर नेटकऱ्यांकडून प्रतिक्रियांचा वर्षाव होतोय. टीझरमधील सई आणि सिद्धार्थची केमिस्ट्री आणि संवादांची जुगलबंदी पाहून प्रेक्षकांमध्ये चित्रपटाविषयी उत्सुकता निर्माण झाली आहे.

‘श्रीदेवी प्रसन्न’ या चित्रपटात सई आणि सिद्धार्थ या दोघांसोबतच सुलभा आर्या, सिद्धार्थ बोडके, रसिका सुनील, संजय मोने, वंदना सरदेसाई, समीर खांडेकर, आकांक्षा गाडे, रमाकांत डायमा, शुभांगी गोखले, पाहुल पेठे, पल्लवी परांजपे, पूजा वानखेडे, सिद्धार्थ महाशब्दे, जियांश पराडे हे कलाकार देखील महत्त्वाच्या व्यक्तिरेखा साकारताना दिसणार आहेत. या चित्रपटाच्या लेखनाची जबाबदारी अदिती मोघे यांनी उचलली असून मराठीतील प्रसिद्ध संगीतकार अमित राज यांनी यातील गाणी संगीतबद्द केली आहेत.

पहा टीझर

View this post on Instagram

A post shared by Tips Films (@tipsfilmsofficial)

‘श्रीदेवी प्रसन्न’ या चित्रपटाचं नाव फक्त फिल्मी नाही तर याचं कथानकही टोटल फिल्मी असल्याचं पहायला मिळत आहे. ‘लव ॲट फर्स्ट साईट’चं स्वप्न मनात बाळगत प्रेमाच्या भन्नाट कल्पना विश्वात वावरणारा प्रसन्न हा मॅट्रिमोनी साइटवर ‘श्रीदेवी’ या नावाच्या उत्सुकतेपोटी तिला रिक्वेस्ट पाठवतो आणि ती अॅक्सेप्टदेखील करते. त्यानंतर दोघांची भेट होते आणि त्यापुढील काही गमतीजमतींची झलक या टीझरमध्ये पहायला मिळतो. या दोन टोकांच्या माणसांची मनं जुळतात की नाही, त्या दरम्यान नेमकं काय काय घडतं हे ‘श्रीदेवी प्रसन्न’ या चित्रपटात पहायला मिळेल. विशाल विमल मोढवे दिग्दर्शित ‘श्रीदेवी प्रसन्न’ हा चित्रपट येत्या 2 फेब्रुवारी रोजी प्रदर्शित होणार आहे.