‘अनाथाश्रमात भेटलेल्या या चिमुकलीने..’; सुष्मिता सेनच्या पोस्टने वेधलं नेटकऱ्यांचं लक्ष
अभिनेत्री सुष्मिता सेनने 'मिस युनिव्हर्स'चा किताब जिंकून 30 वर्षे पूर्ण झाली आहेत. यानिमित्त तिने सोशल मीडियावर खास फोटो पोस्ट केला आहे. यामध्ये ती एका चिमुकलीसोबत असून तिला सुष्मिताने अनाथाश्रमातून दत्तक घेतलं होतं.
तीस वर्षांपूर्वी 21 मे 1994 रोजी अभिनेत्री सुष्मिता सेनने ‘मिस युनिव्हर्स’चा किताब जिंकत भारतीयांची मान उंचावली होती. त्या घटनेला आज तीस वर्षे पूर्ण झाल्याने सुष्मिताने आठवणींना उजाळा दिला आहे. तेव्हा ती फक्त 18 वर्षांची होती. इन्स्टाग्रामवर तिने एका चिमुकलीसोबतचा फोटो शेअर करत भावना व्यक्त केल्या आहेत. सुष्मिताच्या कडेवर असलेली ही चिमुकली तिचीच मुलगी रेने आहे. रेनेला सुष्मिताने अनाथाश्रमातून दत्तक घेतलं होतं. तिनेच मला माझ्या आयुष्यातील अत्यंत निरागस आणि तितकीच खोल शिकवण दिल्याचं सुष्मिताने या पोस्टमध्ये म्हटलंय.
सुष्मिता सेनची पोस्ट-
‘अनाथाश्रमात भेटलेल्या या चिमुकल्या मुलीने मी 18 वर्षांची असताना आयुष्यातील सर्वांत निरागस आणि तितकीच महत्त्वपूर्ण शिकवण दिली. आजही मी त्याला अनुसरून जगतेय. कॅमेराच टिपलेला हा क्षण 30 वर्षांपूर्वीचा आहे, जेव्हा भारताने ‘मिस युनिव्हर्स’ स्पर्धेत आपला पहिला विजय नोंदविला होता. तेव्हापासूनचा हा प्रवास अत्यंत अद्भुत राहिला आहे’, असं लिहित तिने चाहत्यांचे आभार मानले.
View this post on Instagram
सुष्मिताने आधी ‘मिस इंडिया’ या सौंदर्यस्पर्धेत भाग घेतला होता. नंतर 1994 मध्ये तिची स्पर्ध ऐश्वर्या रायविरुद्ध होती. यात तिने विजेतेपद पटकावलं होतं. एका मुलाखतीत सुष्मिताने सांगितलं होतं की, स्पर्धेतील ऐश्वर्याच्या सहभागाबद्दल कळताच तिने तिचा अर्ज मागे घेण्याचा निर्णय घेतला होता. मात्र आईने तिने समजावलं होतं. “माझी आई म्हणाली की ठीक आहे, तिला जिंकू दे. जर तुला वाटत असेल की ती जगातील सर्वांत सुंदर महिला आहे, तर तिला तुझा पराभव करू दे. इतरांकडून हरण्यात काय अर्थ आहे? तू पूर्ण प्रयत्न कर”, असं सुष्मिताने सांगितलं होतं.
मुलीला दत्तक घेण्याच्या निर्णयाबाबत आजही सुष्मिता सेनचं खूप कौतुक केलं जातं. असा निर्णय घेताना अनेकजण पुनर्विचार करतात. मात्र सुष्मिता त्याबाबत ठाम होती आणि या निर्णयात तिला तिच्या वडिलांनी पाठिंबा दिला होता. एका मुलाखतीत सुष्मिता तिच्या दत्तक घेतलेल्या मुलीच्या खऱ्या आईवडिलांविषयी व्यक्त झाली होती. रेने असं तिच्या या मुलीचं नाव आहे. रेनेच्या 18 व्या वाढदिवसापूर्वी सुष्मिताने तिला तिच्या खऱ्या आईवडिलांबद्दल जाणून घेण्याच्या हक्काविषयीची माहिती दिली होती. इतकंच नव्हे तर तिची इच्छा असल्यास त्यांचा शोध घेण्याचीही तयारी सुष्मिताने दाखवली होती.
