अवघ्या काही सेकंदांच्या फरकामुळे थोडक्यात बचावला साऊथ सुपरस्टार; शेअर केला भयानक Video
त्या अवघ्या काही सेकंदांचा खेळ कॅमेरात टिपला गेला आहे. विशालने सोशल मीडियावर हा व्हिडीओ पोस्ट केला आहे आणि देवाचे आभार मानले आहेत. हा व्हिडीओ पाहिल्यानंतर तुमच्याही अंगावर काटा येईल!
चेन्नई : चित्रपटाच्या शूटिंगदरम्यान अनेक घडामोडी घडत असतात. यात अनेकदा ॲक्शन सीन्सचं शूटिंग करताना अपघातही घडतात. ॲक्शन सीन्स शूट करणाऱ्या कलाकारांना दुखापती होतात तर कधी अवघ्या काही सेकंदांच्या फरकाने मोठा अपघात टळतो. अशीच घटना प्रसिद्ध तमिळ अभिनेता आणि निर्माता विशाल कृष्ण रेड्डी याच्यासोबत घडली आहे. विशाल त्याच्या आगामी ‘मार्क अँटनी’ या चित्रपटाचं शूटिंग करत होता, त्यावेळी सेटवर मोठा अपघात घडता घडता वाचला. त्या अवघ्या काही सेकंदांचा खेळ कॅमेरात टिपला गेला आहे. विशालने सोशल मीडियावर हा व्हिडीओ पोस्ट केला आहे आणि देवाचे आभार मानले आहेत. हा व्हिडीओ पाहिल्यानंतर तुमच्याही अंगावर काटा येईल!
मार्क अँटनीच्या शूटिंगदरम्यान सेटवर कास्ट आणि क्रूची मोठी गर्दी होती. अत्यंत महत्त्वपूर्ण सीनचं शूटिंग सुरू होतं. यावेळी सेटवर ट्रकचा वापर केला गेला. मात्र अचानक ट्रकचालकाचा ताबा सुटला आणि तो वेगाने पुढे निघाला. ज्याठिकाणी एक ज्युनिअर आर्टिस्ट त्याच्या शॉटसाठी उभा होता आणि त्याच्यासोबत विशालसुद्धा होता. त्याच दिशेने हा ट्रक निघाला.
चित्रपटातील सीनमध्ये, ट्रकला एका भिंतीला तोडून पुढे थांबायचं होतं. मात्र ट्रकचालकाचं नियंत्रण सुटतं आणि तो थांबण्याऐवजी सुसाट पुढे जातो. यामुळे सेटवर गोंधळ निर्माण होतो. सुदैवाने लोकांची नजर त्या ट्रकवर जाते आणि सर्वजण दुसऱ्या दिशेने धावतात. याच घटनेत विशाल बालंबाल बचावतो. काही तांत्रिक बिघाडामुळे ट्रकचालकाचं नियंत्रण सुटल्याची माहिती समोर येत आहे.
पहा व्हिडीओ
Jus missed my life in a matter of few seconds and few inches, Thanks to the Almighty
Numb to this incident back on my feet and back to shoot, GB pic.twitter.com/bL7sbc9dOu
— Vishal (@VishalKOfficial) February 22, 2023
विशाल कृष्ण रेड्डीने त्याच्या ट्विटर अकाऊंटवर घटनेचा व्हिडीओ पोस्ट केला आहे. ‘फक्त काही सेकंदांचा फरक आणि इंचांच्या अंतराने माझा जीव वाचला. मी देवाचे आभार मानतो. या घटनेनंतर मी सुन्न झालो होतो. मात्र आता ठीक आहे आणि पुन्हा शूटिंगला सुरुवात केली आहे’, असं त्याने लिहिलं.
विशालचा हा व्हिडीओ पाहिल्यानंतर चाहतेसुद्धा थक्क झाले आहेत. विशालचे चाहते त्याचा जीव वाचल्याबद्दल देवाचे आभार मानत आहेत. मार्क अँटनी या चित्रपटाचं दिग्दर्शन अधिक रविचंद्रन करत आहेत. यामध्ये विशालसोबतच रितू वर्मा, अभिनय आणि एसजे सूर्या यांच्या भूमिका आहेत.
विशाल हा प्रसिद्ध चित्रपट निर्माते जीके रेड्डी यांचा मुलगा आहे. विशाल त्याच्या चित्रपटातील जबरदस्त ॲक्शन सीनसाठी ओळखला जातो. त्याचं स्वत:चं प्रॉडक्शन हाऊससुद्धा आहे. त्याचं नाव विशाल फिल्म फॅक्ट्री असं आहे. त्याने सहाय्यक दिग्दर्शक म्हणून करिअरची सुरुवात केली. त्यानंतर 2004 मध्ये त्याने अभिनेता म्हणून चित्रपटसृष्टीत पदार्पण केलं.
