तारक मेहतामध्ये दयाबेन परतणार? निर्माता असित मोदी म्हणाले…

छोट्या पडद्यावरील सर्वांची आवडती मालिका तारक मेहता का उल्टा चष्मा गेल्या 17 वर्षांपासून प्रेक्षकांचे मनोरंजन करत आहे. यातील कलाकारांना आपल्या चाहत्यांच्या मनात घर केलेलं आहे. मात्र गेल्या काही वर्षांमध्ये शोच्या कलाकारांमध्येही बदल झाले आहेत. अनेक जुन्या कलाकारांची जागा नव्या कलाकारांनी घेतली आहे. याचा फटकाही शो ला बसला आहे.

तारक मेहता का उल्टा चष्मा या मालिकेत जेठालालची पत्नी दयाबेनने प्रेक्षकांचे तुफान मनोरंन केले आहे. मात्र मागील काही काळापासून दयाबेन या लोकप्रिय मालिकेचा भाग नाही. त्यामुळे मालिकेत आता जुनी मजा राहिली नाही असे अनेक प्रेक्षकांचे म्हणने आहे. अशातच आता शोच्या निर्मात्यांनी अलीकडेच दयाबेनच्या शोमध्ये परतण्याबद्दल खुलासा केला आहे.

दयाबेन परतणार?

देशातील बऱ्याच लोकांच्या आठवणी, भावना आणि बालपणीचाही तारक मेहता शोशी खास संबंध आहे. दयाबेनची व्यक्तिरेखा नेहमीच मालिकेत आकर्षणाचे केंद्र राहिली आहे.मात्र गेल्या एक दशकापासून दयाबेन या शोमध्ये परतलेली नाही किंवा तिची जागाही दुसऱ्या कलाकाराने घेतलेली नाही. त्यामुळे निराश झाले आहेत आणि त्यांनी निर्मात्यांकडे अनेकदा याबद्दल तक्रारही केलेली आहे. आता दयाबेल शोमध्ये पुन्हा परतणार असल्याची चर्चां रंगली आहे. याबाबत सविस्तर माहिती जाणून घेऊयात.

असित मोदी काय म्हणाले?

मालिकेचे निर्माते असित मोदी दयाबेनच्या परतण्याबद्दल म्हणाले की, ‘आम्ही लवकरच तारक मेहता का उल्टा चष्मामध्ये दयाबेनला आणू.’ दयाबेन जुनी असेल का? असे विचारले असता मोदी म्हणाले – “हे शक्य होणे कठीण आहे पण ती परत यावी अशी माझी इच्छा आहे. काहीही झाले तरी आम्ही दयाबेनला शोमध्ये परत आणण्याचा प्रयत्न करू आणि आम्ही त्यावर कामही करत आहोत.” या मालिकेत दयाबेनची भूमिका दिशा वकानीने साकारली होती मात्र ती गेल्या काही वर्षांपासून शोमध्ये दिसलेली नाही.

मालिकेच्या टीआरपीवर असित मोदींचे भाष्य

तारक मेहता का उल्टा चष्मा या मालिकेच्या टीआरपीबद्दल बोलताना असित मोदी म्हणाले की, “कधीकधी इतर चॅनेलकडून अधिक स्पर्धा मिळते, तसेच कधीकधी काही बातम्यांमुळे लोकांचे लक्ष दुसरीकडे जाते. परंतु सोनी लिव्ह आणि यूट्यूबवर आमचे निष्ठावंत प्रेक्षक आहेत, त्यामुळे ही चिंतेची बाब नाही.”