या दिग्दर्शकाचा प्रत्येक सुपरहिट चित्रपट होता रिमेक, शेवटच्या चित्रपटाने कमाई केली आणि प्रेक्षकांना रडवलेही

Bollywood Movies : जगातील कोणत्याही चित्रपटसृष्टीत प्रत्येक दिग्दर्शकाची स्वतःची एक वेगळी ओळख असते. कोणी भव्य अ‍ॅक्शनपटांसाठी ओळखला जातो तर कोणी व्हिज्युअल इफेक्ट्ससाठी. दक्षिणेतील दिग्दर्शक अ‍ॅटली त्याच्या दमदार अ‍ॅक्शन-थ्रिलरसाठी प्रसिद्ध आहे तर हॉलीवूडमध्ये जेम्स कॅमेरून यांची ओळख ‘अवतार’सारख्या भव्य अ‍ॅनिमेटेड चित्रपटांमुळे आहे. याच धर्तीवर बॉलिवूडमध्येही एक असा दिग्दर्शक आहे ज्याची ओळख ऐकून कदाचित काहींना हसू येईल पण ही ओळख तितकीच वेगळी आणि रंजक आहे.

हा दिग्दर्शक म्हणजे मोहित सूरी. बॉलिवूडमध्ये रिमेक चित्रपटांद्वारे सातत्याने यश मिळवणारा दिग्दर्शक म्हणून त्यांची ओळख निर्माण झाली आहे. सोशल मीडियावर आदित्य साहा नावाच्या एका ट्विटर (X) युजरने मोहित सूरी यांच्या चित्रपटांबाबत एक पोस्ट शेअर करत त्यांची बहुतेक चित्रपट रिमेक किंवा प्रेरित असल्याचा दावा केला आहे. या पोस्टमुळे पुन्हा एकदा मोहित सूरी यांच्या फिल्मोग्राफीवर चर्चा सुरू झाली आहे.

रिमेकची यशस्वी परंपरा

मोहित सूरी यांचा पहिला गाजलेला चित्रपट ‘जहर’ हा हॉलीवूड चित्रपट Out of Time वर आधारित असल्याचे सांगितले जाते. त्यानंतर आलेला ‘आवारापन’ हा कोरियन चित्रपट A Bittersweet Life चा रिमेक मानला जातो. त्याचप्रमाणे, ‘मर्डर 2’ ची कथा कोरियन थ्रिलर The Chaser पासून प्रेरित असल्याचे बोलले जाते. बॉलिवूडमधील लोकप्रिय प्रेमकथा ‘आशिकी 2’ ही हॉलीवूड क्लासिक A Star Is Born ची रिमेक असल्याचा उल्लेख केला जातो. याशिवाय, ‘एक व्हिलन’ हा कोरियन चित्रपट I Saw the Devil वर आधारित असल्याचे मानले जाते.

या सगळ्या चित्रपटांमुळे मोहित सूरी यांना ‘रिमेक चित्रपटांचा बादशाह’ अशी ओळख मिळाली. मात्र, केवळ कथा उचलणे एवढाच त्यांचा फॉर्म्युला नसून त्या कथांना भारतीय भावनिक संदर्भ, संगीत आणि प्रेमकथेची जोड देणे हीच त्यांची खरी ताकद असल्याचे मानले जाते.

‘सैयारा’

मोहित सूरी यांच्या चित्रपटांच्या यादीत ‘सैयारा’ या चित्रपटाला खास स्थान आहे. हा त्यांचा शेवटचा चित्रपट होता. हा चित्रपट कोरियन चित्रपट A Moment to Remember चा रिमेक असल्याचे सांगितले जाते. मात्र, रिलीजच्या वेळी फार मोठ्या प्रमोशनशिवाय आलेल्या या चित्रपटाने बॉक्स ऑफिसवर अपेक्षेपेक्षा मोठे यश मिळवले आणि शेवटी प्रेक्षकांना रडवलं देखील.

वेगळी ओळख, वेगळी वाट

मोहित सूरी यांच्यावर रिमेक करण्याचे आरोप होत असले तरी त्यांनी त्या कथांना भारतीय संवेदनशीलतेचा स्पर्श देऊन यशस्वीपणे सादर केले, हेही तितकेच खरे आहे. प्रेम, वेदना, संगीत आणि भावना यांचे मिश्रण करून त्यांनी बॉलिवूडमध्ये स्वतःची एक वेगळी जागा निर्माण केली आहे. म्हणूनच, रिमेक असो वा मूळ कथा प्रेक्षकांच्या हृदयाला हात घालणारे चित्रपट बनवणे हीच मोहित सूरी यांची खरी ओळख ठरली आहे.