ईठा रिलीज होणार की नाही? प्रचंड वादानंतर आता विठाबाईंचाच नातू आला समोर, म्हणाला, श्रद्धा कपूर… मोठी अपडेट काय?
'ईठा' सिनेमाच्या नावावरून सुरू असलेला वाद आता संपुष्टात आला आहे. तमाशासम्राज्ञी विठाबाई नारायणगावकर यांचे नातू मोहित यांनी स्पष्ट केले की, निर्मात्यांनी 'ईठा' हे नाव ग्रामीण महाराष्ट्रात विठाबाईंना कसे ओळखले जाते, हे समजावून दिल्याने कुटुंबाची चिंता दूर झाली. कुटुंबाने आता चित्रपटाला पाठिंबा दर्शवला असून, लवकरच श्रद्धा कपूरसह 'ईठा' टीम नारायणगावात भेट देणार आहे.
प्रदर्शित होण्यापूर्वीच ईठा हा सिनेमा वादात अडकला आहे. या सिनेमातील कंटेट, गाणी किंवा एखाद्या प्रसंगावरून हा सिनेमा वादात अडकलेला नाहीये. तर या सिनेमाच्या शीर्षकावरून हा सिनेमा वादात अडकला आहे. या सिनेमाला ईठा हे नाव देऊन तमाशासम्राज्ञी विठाबाई नारायणगावकर यांचा अपमान करण्यात आलाचा दावा आक्षेप घेणाऱ्यांनी केला आहे. तसेच या सिनेमाचं नाव बदलण्याची जोरदार मागणी करण्यात आली आहे. त्यामुळे हा सिनेमा प्रदर्शित होणार की नाही? अशी शक्यता निर्माण झालेली असतानाच विठाबाई यांचे नातू मोहित विठाबाई नारायणगावकर यांची प्रतिक्रिया समोर आली आहे. एका वृत्तवाहिनीशी बोलताना त्यांनी मनमोकळं केलं आहे.
‘ईठा’ चित्रपटाच्या शीर्षकाबाबत सुरुवातीला निर्माण झालेल्या चिंतेवर मोहित विठाबाई नारायणगावकर यांनी स्पष्टीकरण दिले असून, निर्मात्यांनी दिलेल्या कारणामुळे कुटुंबाच्या शंका दूर झाल्याचे मोहित यांनी स्पष्ट केले आहे. एका वृत्तवाहिनीशी बोलताना विठाबाई नारायणगावकर यांचे नातू म्हणाले, “आमचीही या चित्रपटाच्या शीर्षकाबाबत चिंता होती. आम्ही विनंती केली होती की चित्रपटाचे नाव ‘ईठा’ ऐवजी ‘विठाबाई नारायणगावकर’ असावे. पण निर्माते आणि दिग्दर्शकांनी आम्हाला समजावून सांगितले आणि त्यांचे म्हणणे पटण्यासारखे होते. त्यांनी सांगितले की, ग्रामीण महाराष्ट्रात लोक अजूनही विठाबाईंना ‘ईठा’ म्हणूनच ओळखतात. हे ऐकल्यानंतर आमच्या शंका दूर झाल्या.” मोहित यांनी सांगितले की, या स्पष्टीकरणामुळे कुटुंबाचे समाधान झाले असून, ग्रामीण महाराष्ट्र आणि त्याची सांस्कृतिक मुळे प्रामाणिकपणे पडद्यावर मांडल्याबद्दल त्यांनी चित्रपट निर्मात्यांचे कौतुक केले.
टीम गावात येणार
“चित्रपट अतिशय सुंदर बनवला आहे. हा चित्रपट पाहिल्यानंतर लोक म्हणतील, ‘तुम्ही खरोखरच तमाशा परंपरा आणि मराठी संस्कृतीचे वारसदार आहात.’ मला विश्वास आहे की प्रेक्षक हा चित्रपट मनापासून स्वीकारतील,” असे मोहित म्हणाले. चित्रपट प्रदर्शित होण्यापूर्वी नारायणगाव येथे मोठा उत्साह असल्याचेही त्यांनी सांगितले. मोहित यांच्या माहितीनुसार, श्रद्धा कपूरसह ‘ईठा’ चित्रपटाचे कलाकार आणि टीम चित्रपट प्रदर्शित होण्याआधी गावाला भेट देणार आहेत. मोहित यांनी सांगितले की चित्रपटाची अभिनेत्री श्रद्धा कपूर आणि ‘ईठा’ची संपूर्ण टीम नारायणगावला येणार आहे.
