Adipurush: युट्यूबरने रिक्रिएट केला ‘आदिपुरुष’चा अंडरवॉटर सीन; नेटकरी म्हणाले ‘यालाच सिनेमा एडिट करायला द्या’
500 कोटींच्या बजेटला तोडीस तोड रिक्रिएट केला 'आदिपुरुष'चा सीन; पहा Video
मुंबई: ओम राऊत दिग्दर्शित ‘आदिपुरुष’ या चित्रपटाचा टीझर जेव्हा प्रदर्शित झाला, तेव्हा नेटकऱ्यांकडून त्यावर खूप टीका झाली. आदिपुरुषच्या टीझरमधील VFX ची सर्वाधिक खिल्ली उडवली गेली. हा वाढता विरोध पाहता अखेर निर्मात्यांनी चित्रपटातील व्हिज्युअल इफेक्ट्स आणि कलाकारांच्या लूकवर पुन्हा काम करण्याचा निर्णय घेतला. याच कारणासाठी प्रदर्शनाची तारीखसुद्धा पुढे ढकलण्यात आली. आता एका युट्यूबरने ‘आदिपुरुष’च्या टीझरमधील प्रभासचं अंडरवॉटर सीन रिक्रिएट केलं आहे. त्याचा हा व्हिडीओ सोशल मीडियावर तुफान व्हायरल होतोय.
एका इन्स्टाग्राम अकाऊंटवर हा व्हिडीओ पोस्ट करण्यात आला आहे. आदिपुरुषच्या टीझरची सुरुवात प्रभासच्या याच अंडरवॉटर सीनने होती. हा सीन या युट्यूबरने थ्रीडीमध्ये हुबेहूब रिक्रिएट केला आहे. या व्हिडीओच्या सुरुवातीला टीझरची एक झलक पहायला मिळते. त्यानंतर तो युट्यूबर स्वत: 3D स्कॅन कसा केला आणि त्यानंतर ब्लेंडरमध्ये सीन कसा तयार झाला, हे दाखवतो.
व्हिडीओच्या अखेरीस जेव्हा रिक्रिएट केलेला सीन पहायला मिळतो, तेव्हा तो हुबेहूब आदिपुरुषमधल्या टीझरसारखा वाटतो. त्यामुळे नेटकऱ्यांकडून त्यावर लाईक्स आणि कमेंट्सचा वर्षाव होतोय. ‘500 कोटी रुपयांच्या बजेटमध्ये बनलेल्या आदिपुरुषपेक्षा हा व्हिडीओ सुंदर आहे’, असं एकाने म्हटलंय. तर ‘एक युट्यूबरच आदिपुरुषच्या संपूर्ण VFX टीमपेक्षा चांगलं काम करू शकतो’, अशा शब्दांत दुसऱ्या युजरने कौतुक केलं.
View this post on Instagram
याआधीही ‘आदिपुरुष’च्या टीझरमधील सैफ अली खानचा ड्रॅगन सीन एका युजरने रिक्रिएट केला होता. तो व्हिडीओसुद्धा सोशल मीडियावर तुफान व्हायरल झाला होता.
आदिपुरुष हा चित्रपट जून 2023 मध्ये प्रदर्शित होणार आहे. आधी या चित्रपटाच्या प्रदर्शनाची तारीख जानेवारी 2023 होती. आदिपुरुष या चित्रपटात प्रभासने राम, सैफ अली खानने रावण आणि क्रिती सनॉनने सीतेची भूमिका साकारली आहे.
