Health: स्त्रियांमध्ये हार्ट अटॅक येण्याआधी जाणवतात ही लक्षणे, चुकूनही करू नये दुर्लक्ष
पुरुषांच्या तुलनेत स्त्रियांमध्ये हार्ट अटॅकची लक्षणं वेगळी असतात. आतासेच जोखीमही काही मरामनात वेगळी असते.
मुंबई, बदलत्या जीवनशालीचा आरोग्यावर होत असलेला प्रभाव मोठ्या प्रमाणात पाहायला मिळत आहे. त्यापैकी हृदयविकार हा अनेकांना मृत्यूच्या कवेत घेत आहे. अगदी तारुण्यातदेखील याचे बळी ठरणाऱ्यांची संख्या झपाट्याने वाढत आहे. हृदयविकाराचा (heart attack) झटका कोणाहीसाठी धोकादायक असतो. पण पुरूषांच्या (men) तुलनेत स्त्रियांना (Women) हृदयविकाराचा झटका आल्यानंतर त्यांच्या मृत्यूची शक्यता जास्त असल्याचे अध्ययनात समोर आले आहे. पुरूषांच्या तुलनेत महिलांना वर्षाच्या आत दुसरा हृदयविकाराचा झटका येण्याची शक्यता जास्त असते असे संशोधन सांगते.
स्त्रियांच्या शरीराची कार्यप्रणाली पुरूषांच्या तुलनेत वेगळी असते. तसेच जोखीम आणि रोगनिदानही वेगवेगळे असते. अनेक स्त्रियांना आरोग्याकडे दुर्लक्ष करण्याची सवय असते त्यामुळे त्या वैद्यकीय मदत घेण्याची शक्यता कमी असते. हार्ट अटॅक येण्याआधी स्त्रियांमध्ये कोणती लक्षणं जाणवतात पाहूया.
अटॅक येण्याआधी जाणवतात ही लक्षणे
- लक्षणे सौम्य असल्याने स्त्रियांमध्ये हृदयविकाराचा झटका ओळखणे कठीण असू शकते. काहीवेळा नुसती एसिडिटी झाल्याचे दिसू शकते.
- महिलांमध्ये छातीत दुखणे किंवा अस्वस्थता ही लक्षणे कमी दिसून येतात. श्वास लागणे, ओटीपोटात अस्वस्थता, चक्कर येणे, पाठीच्या वरच्या भागात दाब, खूप थकवा येणे यासारखी लक्षणे पुरूषांच्या तुलनेत जास्त वेळा जाणवू शकतात. हा फरक दोघांच्या शरीरातील रक्तवाहिन्यांच्या फरकामुळे निर्माण होतो.
- पुरूषांमध्ये मुख्य धमनीत ब्लॉक निर्माण होतो. तर स्त्रियांमध्ये हृदयाला रक्तपुरवठा करणाऱ्या लहान रक्तवाहिन्यांना जास्त धोका पोहोचून त्या प्रभावीत होतात.
अशी घ्या काळजी
जोखीम जास्त असलेल्या महिलांनी नियमित वैद्यकीय तपासणी करणे, जीवनशैलीत बदल करणे फार गरजेचे आहे. त्यामुळे हृदयविकाराचा धोका आणि मृत्यूची शक्यता कमी होऊ शकतो. जीवनशैलीतील काही महत्वाच्या बदलांमध्ये आहाराद्वारे वजनावर नियंत्रण ठेवणे आणि रोज 30 मिनिटे व्यायाम करणे महत्वाचे आहे.
आहारात भाज्या आणि फळे, कार्बोहायड्रेट्स आणि मासे किंवा बिया यांसारख्या ओमेगा-3-फॅटी ऍसिडमध्ये समृद्ध अन्नाचा समावेश असावा.
