सकाळी उठल्यावर मान दुखतेय? मग झोपताना नक्की करताय ही गंभीर चूक
मान दुखीकडे सुरुवातीला दुर्लक्ष केल्यास ते पुढे गंभीर स्वरूप धारण करू शकते. म्हणूनच, आपल्या झोपण्याच्या सवयींमध्ये हे छोटे छोटे बदल करून आपण ही समस्या सहज टाळू शकतो.
गोड झोप ही शरीरासाठी तितकीच गरजेची असते, जितकी अन्न आणि पाण्याची गरज असते. मात्र, झोपताना केलेल्या काही चुकीच्या सवयींमुळे मान दुखणे ही समस्या निर्माण होऊ शकते. अनेकांना सकाळी उठल्यानंतर मानेत कडकपणा, मान फिरवताना त्रास किंवा एकाच जागेवर तीव्र वेदना जाणवतात. ही समस्या केवळ तात्पुरती नसून दीर्घकाळ टिकल्यास ती मोठ्या त्रासाचे कारण ठरू शकते. विशेषत: आपल्या झोपण्याच्या पद्धतीकडे लक्ष दिले नाही तर हा त्रास अधिक वाढू शकतो.
उशी वापरणे : मान दुखण्यामागे सगळ्यात मोठं कारण म्हणजे चुकीचा उशी वापरणं. जर उशी खूप उंच असेल तर मानेवर अतिरिक्त ताण येतो, ज्यामुळे स्नायूंमध्ये ताण निर्माण होतो. त्याचप्रमाणे खूपच पातळ किंवा सपाट उशी वापरल्यास देखील मान योग्य पोझिशनमध्ये राहत नाही आणि त्यामुळे झोपेतही मान वळते, झुकते आणि त्याचा त्रास सुरू होतो. म्हणून उशी नेहमी मान व डोक्याला योग्य सपोर्ट देणारी निवडावी.
झोपताना हात डोक्याखाली ठेवणे : अनेक लोक साइडमध्ये झोपताना आपला हात डोक्याखाली ठेवतात. ही सवय अतिशय चुकीची असून, त्यामुळे मानेला अनावश्यक वळण मिळते. स्नायूंवर ताण येतो आणि सकाळी उठल्यावर मानेत जडपणा जाणवतो. त्यामुळे साइडमध्ये झोपताना हात नेहमी सरळ ठेवावा व योग्य सपोर्ट असलेली उशी वापरावी.
सतत हालचाल करणे : रात्रभर सतत हालचाल करणं देखील मानेच्या दुखण्याचं एक कारण ठरू शकतं. झोपेत स्थिर पोझिशनमध्ये राहणं मानेसाठी उत्तम असतं. सतत हालचाल केल्याने स्नायूंना विश्रांती मिळत नाही व त्यामुळे सकाळी दुखणे जाणवते. शक्य असल्यास झोपताना एका आरामदायक पोझिशनमध्ये स्थिर राहण्याचा प्रयत्न करा.
गादीचा वापर : फक्त उशीच नव्हे तर गादी देखील तितकीच महत्त्वाची असते. खूपच टणक किंवा खूपच मऊ गादी देखील झोपेची पोझिशन बिघडवू शकते. त्यामुळे शरीराला योग्य पाठिंबा देणारी ऑर्थोपेडिक गादी निवडावी. योग्य गादीमुळे मानेचा नैसर्गिक वाकाच जपला जातो व दुखणे टाळता येते.
दुखणं टाळण्यासाठी काय करावं?
1. मानेला योग्य आधार देणारी उशी वापरा.
2. साईडमध्ये झोपताना हात डोक्याखाली ठेवू नका.
3. शक्य तितकं स्थिर झोपण्याचा प्रयत्न करा.
4. योग्य गादीची निवड करा.
5. झोपण्याआधी हलक्या मानेचा व्यायाम करा.
6. जर दुखणे सातत्याने होत असेल तर लवकरात लवकर डॉक्टरांचा सल्ला घ्या.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही.)
