अवघ्या 33 व्या वर्षात 80 खून… नराधमाने कबुली देताच पोलीस हादरले, लपण्यासाठी बायकांच्या…

एखाद्या व्यक्तीवर एक दोन नव्हे तर तब्बल 80 खूनाचा आरोप असेल आणि तो मुलगी बनून फिरत असेल तर पोलीसही चक्रावून जातात. अशा चालाख आरोपीला शोधणं सोपं नसतं. पण पोलिसांनी मोठ्या शिताफिने या नराधमाला अटक केली आहे. ब्राझिलमधील ही घटना आहे. पण हादरवणारी आहे. एका 33 वर्षाच्या संशयित सीरिअल किलरला पोलिसांनी अटक केली आहे. तो महिलेचा वेष धारण करून पळण्याच्या प्रयत्नात होता. पोलिसांनी त्याची कसून चौकशी केली असता त्याने त्याच्या 33 वर्षाच्या आयुष्यात 80 खून केल्याची कबुली दिली आहे. मात्र, पोलीस त्याच्या या दाव्याची पडताळणी करत आहेत.

न्यूयॉर्क पोस्टने ही बातमी दिली आहे. ब्राझिलच्या उत्तर पूर्वेकडील पैराइबा राज्यातील ही घटना आहे. पोलिसांनी 33 वर्षाच्या जोरलान अल्वेस दा सिल्वा नावाच्या व्यक्तीला पकडलं आहे. त्याने जाळीदार ड्रेस घातलेला होता. डोक्यावर लांब सडक केसांचा विग लावला होता. त्याने महिलांसारखी सँडल घातली होती. काळा चष्मा लावला होता आणि हाताच्या बोटांना नेल पॉलिश केली होती. एवढेच नव्हे तर त्याच्या जवळ दोन वर्षाचा एक मुलगाही होता. हा छोटा मुलगा त्याच्याकडे कुठून आला? त्याने कुणाचं बाळ चोरलं तर नाही ना? याचा आता पोलीस तपास करत आहेत.

पोलिसांनी त्याला अटक केल्यानंतर सर्वात आधी त्याच्या डोक्यावरची विग हटवली. त्यामुळे त्याची खरी ओळख पटली. विग खाली त्याच्या डोक्यावर छोटे केस होते. पोलिसांनी केलेल्या या कारवाईचा एक व्हिडीओही व्हायरल झाला आहे.

आधीही निसटला…

रिपोर्टनुसार, पोलिसांनी यापूर्वीही जोरलान आणि त्याच्या काही कथित मित्रांना अटक केली होती. पोलिसांनी एक गाडी थांबवली होती. या गाडीची तपासणी करत असताना त्याला अटक केली होती. मात्र, त्यावेळी तो पोलिसांना गुंगारा देऊन पळून जाण्यात यशस्वी झाला होता. त्यानंतर पोलिसांनी त्याचा बराच शोध घेतला होता. पण तो सापडत नव्हता. शेवटी तो पोलिसांना आता महिलेच्या वेषात सापडला. पोलिसांना गुंगारा देण्यासाठी आणि ओळख लपवण्यासाठी त्याने हे वेषांतर केल्याचं समोर आलं आहे.

तीन महिन्यात 15 हत्या

संघटीत गुन्हेगारी करणाऱ्या टोळीसाठी सुपारी घेऊन हत्या करण्याचा त्याच्यावर आरोप आहे. गेल्या तीन महिन्यात त्याने कमीत कमी 15 हत्या केल्याचं उघड झालं आहे. पोलिसांनी त्याची कसून चौकशी केली असता त्याने त्याच्या आयुष्यात 80 लोकांना ठार मारल्याची कबुली दिली आहे. वयाच्या अवघ्या 13 व्या वर्षी पहिली हत्या केल्याचं त्याने सांगितलं. त्याने एवढा मोठा दावा केला असला तरी त्याची सत्यता पोलीस पडताळत आहेत.

डबल मर्डरने हादरले

दरम्यान, जोरलानची कसून चौकशी केली असता त्याने डबल मर्डर केल्याचीही कबुली दिली आहे. 1 ऑगस्ट रोजी रियो तिंटोमध्ये झालेल्या दोन व्यापाऱ्यांच्या हत्येशी संबंधित हे प्रकरण आहे. पोलीस अधिकारी डगलस गार्सिया यांनी याबाबतची माहिती दिली. ज्या ठिकाणी कथितपणे मृतदेह दफन करण्यात आले होते, त्या ठिकाणपर्यंत जोरलान पोलीस अधिकाऱ्यांना घेऊन गेला होता. ही माहिती महत्त्वाची असून त्या दिशेने तपास सुरू आहे, असं डगलस गार्सिया यांनी म्हटलं आहे.

जोरलानने 80 हत्या केल्याचं पोलिसांनी सिद्ध केलं तर ब्राझिलच्या गुन्हेगारीच्या इतिहासातील हा सर्वात मोठा गुन्हा असणार आहे. यापूर्वी पेड्रो रोड्रिग्सवर सर्वाधिक 71 हत्या केल्याचा आरोप होता. त्यात तो दोषी ठरला होता. रोड्रिग्सने 100 लोकांना मारल्याचा दावा केला होता. त्यामुळे जोरलानचा 80 हत्येचा दावा खरा ठरला तर ब्राझिलच्या इतिहासातील ही सर्वात धक्कादायक घटना असणार आहे.