7 लाख परदेशी विद्यार्थ्यांना कॅनडा सोडावा लागणार? ‘या’ कारणानं भविष्य धोक्यात

Canada Work Permit Expire: कॅनडात शिकणाऱ्या परदेशी विद्यार्थ्यांचे भवितव्य संकटाच्या भोवऱ्यात सापडले आहे. सुमारे 7 लाख परदेशी विद्यार्थी आहेत, ज्यांना पुढील वर्षी कॅनडा सोडावे लागू शकते. यामुळे कॅनडामध्ये वर्क परमिटची मुदत संपलेल्या विद्यार्थ्यांसमोर चिंता आहे.

कॅनडात राहणाऱ्या 7 लाख परदेशी विद्यार्थ्यांना पुढील वर्षी कॅनडा सोडावे लागू शकते. ट्रुडो सरकारच्या एका निर्णयामुळे या विद्यार्थ्यांचे भवितव्य अधांतरी आहे.

ट्रुडो स्थलांतरितांबाबत अत्यंत कडक आहेत. सन 2025 मध्ये 50 लाख तात्पुरत्या परमिटची मुदत संपत असून, त्यापैकी 7 लाख परमिट विद्यार्थ्यांचे असून काटेकोरपणामुळे या विद्यार्थ्यांना पुन्हा परमिट मिळण्यात मोठी अडचण येऊ शकते.

ट्रुडो यांच्यावर विरोधकांची टीका

ट्रुडो यांच्या या हेतूला त्यांच्याच देशात विरोध होत आहे. कंझर्व्हेटिव्ह पक्षाचे नेते पियरे पोलिव्हेर यांनी पंतप्रधान जस्टिन ट्रुडो यांच्या धोरणांवर टीका करताना म्हटले आहे की, यामुळे तात्पुरत्या रहिवाशांसाठी अनिश्चितता निर्माण झाली आहे आणि त्याचा देशाला फायदा होत नाही. 2025 च्या अखेरीस सुमारे 50 लाख तात्पुरत्या रहिवाशांना देश सोडावा लागू शकतो.

कॅनडाच्या इमिग्रेशन अधिकाऱ्यांना अशी अपेक्षा आहे की, बहुतेक स्थलांतरित त्यांच्या परवान्याची मुदत संपल्यानंतर कॅनडा सोडून जातील. कॅनडाचे इमिग्रेशन मंत्री मार्क मिलर यांनी या आठवड्याच्या सुरुवातीला सांगितले होते की, मुदत संपलेल्या 50 लाख परमिटपैकी 7 लाख परदेशी विद्यार्थ्यांचे होते ज्यांना ट्रुडो सरकारच्या अलीकडील स्थलांतरितविरोधी धोरणांमुळे आव्हानांचा सामना करावा लागत आहे.

कडक चौकशी केली जाईल

तात्पुरते वर्क परमिट साधारणपणे 9 महिने ते 3 वर्षांसाठी दिले जातात. कॅनडामध्ये कायमस्वरूपी वास्तव्यासाठी अर्ज करण्यासाठी आवश्यक अनुभव मिळविण्यासाठी पदविका किंवा पदवी असलेल्या परदेशी विद्यार्थ्यांना हे वर्क परमिट दिले जातात.

कॅनडामध्ये राहण्यासाठी मोठ्या संख्येने विद्यार्थी अर्ज करत आहेत, ही चिंताजनक बाब असल्याचे कॅनडाचे इमिग्रेशन मंत्री मार्क मिलर यांनी म्हटले आहे. त्यामुळे आम्ही या अर्जांची काटेकोर छाननी करून बोगस अर्जदारांना बाहेर काढू.

काहींना नवीन वर्क परमिटही देणार

सर्व तात्पुरत्या स्थलांतरितांना बाहेर पडण्याची गरज भासणार नाही, असे कॅनडाचे इमिग्रेशन मंत्री मार्क मिलर यांनी म्हटले आहे. त्याऐवजी काहींना नवीन परमिट किंवा पदव्युत्तर वर्क परमिट देण्यात येणार आहे.

कॅनडाच्या स्थलांतर विभागाच्या आकडेवारीनुसार, मे 2023 पर्यंत 10 लाखांहून अधिक परदेशी विद्यार्थी कॅनडात होते. त्यापैकी 3 लाख 96 हजार 235 जणांकडे 2023 अखेरपर्यंत पदव्युत्तर वर्क परमिट होते. पण कॅनडा आता हे परवाने देताना बरीच काटेकोरपणा करत आहे. यामुळे कॅनडाने 2024 मध्ये आंतरराष्ट्रीय विद्यार्थी परमिट 35 टक्क्यांनी कमी केले. आता ट्रुडो सरकार 2025 मध्ये त्यात आणखी 10 टक्के कपात करण्याची योजना आखत आहे.