Donald Trump : तर 100 टक्के टॅरिफ लावू.. ट्रम्प यांचे पुन्हा ‘टॅरिफास्त्र’, या देशांना मोठा इशारा; भारत…
डोनाल्ड ट्रम्प यांनी 'डिजिटल सेवा कर' (DST) लावणाऱ्या देशांना १००% शुल्क आकारण्याची धमकी दिली आहे. अमेरिकन कंपन्यांवर कर लादल्यास व्यापार करार रद्द केले जातील, असे ट्रम्प यांनी स्पष्ट केले. युरोपीय देशांच्या या भूमिकेला अमेरिकेचा विरोध आहे. यामुळे जागतिक व्यापारात तणाव वाढला असून, ब्रिटीश आणि फ्रेंच वाईनवरही शुल्क आकारण्याचा इशारा देण्यात आला आहे.
अमेरिकेचे राष्ट्राध्यक्ष डोनाल्ड ट्रम्प यांनी ‘डिजिटल सर्व्हिसेस टॅक्स’ (DST) बाबत अनेक देशांना डायरेक्ट इशारा दिला आहे. त्यांनी पुन्हा टॅरिफची धमकी दिली आहे. ज्या देशांकडून अमेरिकन तंत्रज्ञान कंपन्यांवर हा कर लादला जाईल, त्या देशांच्या अमेरिकेला होणाऱ्या निर्यातीवर 100 टक्के (टॅरिफ) आकारलं जाऊ शकतं, असं ट्रम्प थेट म्हणाले. अशा करांमुळे विद्यमान व्यापार करारांना बाधा पोहोचेल, असेही ट्रम्प यांनी नमूद केले.
अमेरिकन कंपन्यांवर ‘डिजिटल सेवा कर’ (digital services tax) लादणाऱ्या देशांना कठोर प्रतिशोधात्मक शुल्काचा (retaliatory tariffs) सामना करावा लागेल असा इशारा सोशल मीडियावरील एका पोस्टमधून ट्रम्प यांनी दिला. गरज पडली तर सध्याचे (विद्यमान) करार रद्द केले जातील, असंही ट्र्म्प यांनी ठणकावलं. ऑनलाइन जाहिराती, डिजिटल बाजारपेठा आणि वापरकर्त्यांचा डेटा यांतून महसूल मिळवणाऱ्या मोठ्या डिजिटल कंपन्यांच्या उत्पन्नावर हा डिजिटल सेवा कर आकारला जातो.
युरोपीय देशांचा युक्तिवाद काय ?
अनेक युरोपीय देशांनी असे कर लागू केले आहेत किंवा प्रस्तावित केले आहेत. बहुराष्ट्रीय तंत्रज्ञान कंपन्या ज्या ठिकाणी महसूल मिळवतात, त्या ठिकाणी जास्त कर भरावा असा त्यांचा युक्तिवाद आहे. मात्र अमेरिकेने या उपायांना दीर्घकाळापासून विरोध दर्शवला आहे. डिजिटल सेवा कर विशेषतः गूगल, ॲपल, मेटा, ॲमेझॉन आणि मायक्रोसॉफ्ट यांसारख्या अमेरिकन कंपन्यांना लक्ष्य करतात असा त्यांचा युक्तिवाद आहे.
डिजिटल सर्व्हिस टॅक्स अद्याप अनिर्णित
या वर्षाच्या सुरुवातीला एका मोठ्या व्यापार कराराबाबत सहमती होऊनही, वॉशिंग्टन आणि युरोपीय सरकारे ‘डिजिटल करां’बाबत एकमत होऊ शकलेली नाहीत, अशा वेळी ट्रम्प यांचा हा इशारा आला आहे. ट्रान्स-अटलांटिक व्यापार संबंधांमधील डिजिटल सेवांवरील कर हा अजूनही न सुटलेल्या प्रमुख मुद्द्यांपैकी एक आहे. असा कर लागू करणाऱ्या कोणत्याही देशाला अमेरिकेत निर्यात केल्या जाणाऱ्या सर्व वस्तूंवर 100 % आयात शुल्काचा (टॅरिफचा) सामना करावा लागू शकतो; मग विद्यमान किंवा भविष्यातील कोणतेही व्यापार करार अस्तित्वात असले तरीही, असं अमेरिकेच्या राष्ट्राध्यक्षांनी स्पष्ट केलं.
ब्रिटन आणि फ्रान्सलाही धमकी
ज्या देशांनी ‘डिजिटल सेवा कर’ (digital services tax) लागू केला आहे, त्यांच्याविरुद्ध व्यापारविषयक कारवाई करण्याची धमकी ट्रम्प यांनी वारंवार दिली. या वर्षाच्या सुरुवातीला, अमेरिकेतील प्रमुख तंत्रज्ञान कंपन्यांवर २ टक्के डिजिटल कर लादल्यास ब्रिटनवर आयात शुल्क (टॅरिफ) लादलं जाईल, असा इशारा त्यांनी दिला होता. तसेच, फ्रान्सने आपला डिजिटल कर मागे न घेतल्यास त्यांच्या वाईनवर 100 टक्के आयात शुल्क लादले जाईल, अशी धमकीही त्यांनी दिली होती.
