Donald Trump: ट्रम्प यांची मोठी कारवाई, चार भारतीय कंपन्यांना एका झटक्यात दणका, अचानक असं का केलं?
Trump Action On India : इराणविरुद्धच्या आर्थिक कारवाईचा एक भाग म्हणून, अमेरिकेने भारतीय कंपन्यांवर निर्बंध लादले आहेत.
Donald Trump Actions On India: इराणविरुद्धच्या आर्थिक कारवाईचा एक भाग म्हणून, अमेरिकेने भारतीय कंपन्यांवर निर्बंध लादले आहेत. हे निर्बंध इराणसोबतच्या तेल आणि पेट्रोकेमिकल व्यवहारांमुळे लावण्यात आले आहेत. या चार कंपन्यांव्यतिरिक्त, इराणला केलेल्या प्रवासामुळे तीन भारतीय नागरिकांवरही निर्बंध लादण्यात आले आहेत. अमेरिकेच्या ट्रेझरी विभागाने ‘ऑपरेशन इकॉनॉमिक आउटकास्ट’ अंतर्गत अंदाजे ११९ दशलक्ष डॉलर्सच्या व्यवहारांना लक्ष्य केले आहे. अमेरिकेने या निर्बंधांना जगभरातील देशांसोबतच्या इराणच्या आर्थिंक संबंधावरील पहिला आर्थिक हल्ला म्हटले आहे.
अमेरिकेच्या ट्रेझरी विभागाच्या माहितीनुसार, भारतातील सदाशिव ओव्हरसीज लिमिटेडवर निर्बंध लादण्यात आले आहेत. या कंपनीने फेब्रुवारी २०२४ ते जून २०२५ दरम्यान इराणकडून ६९ दशलक्ष डॉलर्स किमतीची पेट्रोलियम उत्पादने खरेदी केली होती. यातील काही माल बोनजॉर कमोडिटीज एफझेडई कडून पाठवण्यात आला होता, ज्यांच्यावर आधीच निर्बंध लादण्यात आले होते. पीपी सॉफ्टटेक प्रायव्हेट लिमिटेड आणि प्रकृतीज इन्फ्रा इम्पेक्स इंडिया प्रायव्हेट लिमिटेडवरही निर्बंध लादण्यात आले आहेत. या दोन्ही कंपन्यांनी इराणकडून प्रत्येकी २५ दशलक्ष डॉलर्स किमतीची पेट्रोलियम उत्पादने खरेदी केली होती. या तीन कंपन्यांनी मिळून ११९ दशलक्ष डॉलर्स किमतीचा माल आयात केला.
निर्बंध लादलेली चौथी कंपनी पोर्टेज पार्टनर्स एलएलपी आहे. या कंपनीनेही इराणकडून पेट्रोकेमिकल उत्पादने खरेदी करून ती भारतात पाठवली होती. अमेरिकेने निर्बंध लादलेल्या तीन भारतीय नागरिकांमध्ये पीपी सॉफ्टटेकचे संचालक प्रशांत गर्ग, पोर्टेज पार्टनर्सच्या इद्रिसमिया अश्रफमिया शेख आणि हरीश रामचंद्र रंगी यांचा समावेश आहे. अमेरिकेने जगाला स्पष्ट इशारा दिला आहे की, जे इराणला पाठिंबा देतील, त्याच्याशी सहकार्य करतील आणि त्याच्यासोबत व्यावसायिक व्यवहार करतील, त्यांच्यावर निर्बंध लादले जातील. इराणच्या महसुलाचा स्रोत असलेली आर्थिक संसाधने पूर्णपणे नष्ट करणे, हा यामागील उद्देश आहे.
अमेरिकेने इराणविरोधात एक आर्थिक मोहीम सुरू केली आहे, ज्याला व्यापार सचिव स्कॉट बेझंट यांनी “ऑपरेशन इकॉनॉमिक आउटकास्ट” असे नाव दिले आहे. या मोहिमेचा उद्देश इराणच्या आर्थिक जाळ्याला, तेल व्यापारातील उत्पन्नाला आणि जागतिक संबंधांना लक्ष्य करून त्याच्यावर आर्थिक दबाव वाढवणे आणि इराणला अमेरिकेशी सर्व प्रकारचे करार करण्यास भाग पाडणे हा आहे. अमेरिकेचे अध्यक्ष ट्रम्प यांनी इराणविरोधातील या आर्थिक मोहिमेची तुलना दुसऱ्या महायुद्धातील डी-डेच्या दिवशी झालेल्या मित्र राष्ट्रांच्या हल्ल्याशी केली आहे.
