जिनपिंग तिसऱ्यांदा होणार राष्ट्रपती; चीनच्या विस्तारवादी धोरणाला आळा घालण्याचे आव्हान

शी जिनपिंग पुन्हा एकदा चीनचे राष्ट्रपती होणार असल्याचे संकेत मिळत आहेत. राष्ट्रपती निवडीवर विचारमंथन करण्यासाठी सध्या चीनमध्ये सीपीसीची बैठक सुरू आहे.

क्षी जिनपिंग

TV9 मराठी डिजीटल टीम | Edited By: Ajay Deshpande | Updated on: Nov 10, 2021 | 8:09 AM

नवी दिल्ली – शी जिनपिंग पुन्हा एकदा चीनचे राष्ट्रपती होणार असल्याचे संकेत मिळत आहेत. राष्ट्रपती निवडीवर विचारमंथन करण्यासाठी सध्या चीनमध्ये सीपीसीची बैठक सुरू आहे. ही बैठक 11 नोव्हेंबरपर्यंत चालणार असून, बैठकीत पुन्हा एकदा राष्ट्रपतीपदासाठी शी जिनपिंग यांच्या नावावर शिक्कामोर्तब होण्याची शक्यता आहे. असे झाल्यास जिनपिंग तिसऱ्यांदा राष्ट्रपतीपदाची कमान सांभाळतील. माओत्से तुंग नंतर कम्युनिस्ट पार्टीमधील सर्वात शक्तीशाली नेते म्हणून जिनपिंग यांची ओळख आहे. दरम्यान सूत्रांनी दिलेल्या माहितीनुसार यावेळी जिनपिंग हे राष्ट्रपती झाल्यास ते अजीवन चीनच्या राष्ट्रपतीपदावर राहाण्याची शक्यता आहे.

सर्वात शक्तीशाली नेते

सध्या बीजिंगमध्ये सीपीसीची बैठक सुरू आहे. या बैठकीमध्ये पार्टीचे तीन हजारांपेक्षा अधिक सदस्य सहभागी झाले आहेत. मात्र शी जिनपिंग हे या पक्षातील सर्वाधिक शक्तीशाली नेते मानण्यात येतात. सहभागी सदस्यांची इच्छा असो अथवा नसो त्यांना शी जिनपिंग यांना राष्ट्रपतीपदासाठी पाठिंबा द्यावाच लागणार आहे. त्यामुळे जिनपिंग हे पुन्हा एकदा चीनचे राष्ट्रपती होणार असल्याचे बोलले जात आहे. जिनपिंग पुन्हा एकदा राष्ट्रपती झाल्यास भारताची डोकेदुखी वाढण्याची शक्यता आहे.

विस्तारवादी भूमिकेला बळ

शी जिनपिंग पुन्हा एकदा राष्ट्रपती झाल्यास जगातील अन्य देशांसोबतच भारताला देखील अनेक आव्हानांचा सामना करावा लागू शकतो. याचे मुख्य कारण म्हणजे जिनपिंग हे प्रचंड आक्रमक नेते असून, त्यांची महत्वकांक्षा ही विस्तारवादाची आहे. चीनच्या शेजारी असलेल्या अनेक देशांच्या जमीन बळकवण्याचा घाट सध्या चीनकडून सुरू आहे. अशा परिस्थितीमध्ये जिनपिंग राष्ट्रपती झाल्यास चीनच्या विस्तारवादी भूमिकेला आणखी बळ मिळण्याची शक्यता आहे. चीनच्या विस्तारवादी भूमिकेमुळेच सध्या गलवान खोऱ्यामध्ये अनेकवेळ भारत -चीन आमने सामने आल्याचे पाहायला मिळाले आहे. त्यातच जर जिनपिंग हे अजीवन चीनचे राष्ट्रपती बनल्यास एलएसीचा वाद दीर्घकाळ राहाण्याची शक्यता आहे.