Maldives parliamentary election : भारताला प्रचंड मोठा धक्का, मालदीवच्या निवडणुकीत नको ते घडलं

मागच्या काही दिवसांपासून मालदीवमधील प्रत्येक घडामोड चर्चेचा विषय ठरली आहे. मालदीवमधल्या काही नेत्यांनी पंतप्रधान नरेंद्र मोदी यांचा अपमान केला. त्यानंतर भारतात मालदीवबद्दल संतापाची लाट उसळली. बॉयकॉट मालदीवचा ट्रेंड आला होता. अनेक भारतीयांनी आपली मालदीवची बुकिंग रद्द केली होती. मालदीवचे विद्यमान राष्ट्रपती मोहम्मद मुइज्जू यांच्या धोरणांमुळे हे संबंध आणखी बिघडले. आता रविवारी मालदीवच्या संसदीय निवडणुकांचे निकाल जाहीर झाले. मोहम्मद मुइज्जू यांच्या नेतृत्वाखाली पीपुल्स नॅशनल काँग्रेसने 60 पेक्षा अधिक जागा जिंकून प्रचंड बहुमत मिळवलय. राष्ट्रपती मोहम्मद मुइज्जू यांच्यासाठी ही निवडणूक अत्यंत महत्त्वपूर्ण मानली जात होती.

मीडिया रिपोर्ट्नुसार 20 व्या पीपुल्स मजलिस (संसद) निवडणुकीसाठी स्थानिक वेळेनुसार, सकाळी 8.30 ते संध्याकाळी 5.30 वाजेपर्यंत मतदान झालं. मतदान संपताच निवडणूक अधिकाऱ्यांनी मतपेट्या सील करुन मतमोजणी सुरु केली.

किती लाख लोकांनी केलं मतदान

मालदीवच्या निवडणूक आयोगाने दिलेल्या माहितीनुसार, संध्याकाळी 5 वाजेपर्यंत 2 लाख 7 हजार 693 लोकांनी मतदान केलं. एकूण 72.96 टक्के मतदान झालं. यात 1 लाख 4 हजार 826 पुरुष आणि 1 लाख 2 हजार 867 महिलांनी मतदानाचा हक्क बजावला. एकूण 2 लाख 84 हजार 663 लोक मतदानासाठी पात्र होते.

मालदीवसाठी भारतात कुठे झालं मतदान?

मीडिया रिपोर्ट्नुसार संसदीय निवडणुकीसाठी मालदीव आणि तीन अन्य देशात एकूण 602 मतपेट्या ठेवण्यात आल्या होत्या. 34 रिसॉर्ट्स, तुरुंग आणि अन्य औद्योगिक बेटांवर मतदान केंद्र बनवण्यात आली होती. रिपोर्ट्नुसार, मालदीवच्या बाहेर भारतात तिरुवनंतपुरम, श्रीलंकेत कोलंबो आणि मलेशियात कुआलालंपुरमध्ये मतपेट्या ठेवण्यात आल्या होत्या.

किती उमेदवार होते निवडणूक रिंगणात?

मालदीवमधल्या संसदीय निवडणुकीसाठी 6 पक्षांचे 368 उमेदवार निवडणूक रिंगणात होते. या सहा पक्षांमध्ये मुइज्जू यांची पीपुल्स नॅशनल काँग्रेस (पीएनसी), मुख्य विरोधी पक्ष मालदीवियन डेमोक्रेटिक पार्टी (एमडीपी) आणि130 अपक्ष होते.

दोन-तृतीयांश बहुमत मिळवलं

सुरुवातीला जे निकाल हाती आले, त्यानुसार मुइज्जू यांच्या नेतृत्वाखालील पीएनसीने 93 सदस्यांच्या पीपुल्स मजलिसमध्ये 60 पेक्षा अधिक जागांवर विजय मिळवलाय. हे दोन-तृतीयांश बहुमत झालं. मुइज्जू यांच्या नेतृत्वाखाली पीएनसीला 67 जागा मिळाल्या. त्यानंतर एमडीपीला 12 सीट मिळाल्या आणि अपक्ष उमेदवार 10 जागांवर विजयी ठरले.