डोनाल्ड ट्रम्प यांच्याविरोधात प्रचंड मोठे संकट, अमेरिकेतल्या लोकांनीच…नो किंग्स आंदोलनाचा वणवा पेटला!
अमेरिकेत लोक डोनाल्ड ट्रम्प यांच्याविरोधात आंदोलन करत आहेत. तेथे नो किंग्स नावाचे आंदोलन केले जात आहे. त्यामुळे ट्रम्प यांच्यावर एका प्रकारे दुहेरी संकट आले आहे. या आंदोलनात लाखो लोक रस्त्यावर उतरले होते.
No Kings Protest : इस्रायल आणि इराण यांच्यातील युद्धात अमेरिकेनेही उडी घेतलेली आहे. अमेरिकेने आतापर्यंत इराणच्या अनेक महत्त्वाच्या ठिकाणांवर क्षेपणास्त्रं डागले आहेत. या हल्ल्यांमुळे इराणचे मोठे नुकसान झाले आहे. दुसरीकडे इराणनेही आखाती देशात असलेल्या अमेरिकेच्या लष्करी तळांना लक्ष्य केलंय. या हल्ल्यांमुळे अमेरिकेची मोठी आर्थिक हानी झालेली आहे. एकीकडे अमेरिका या युद्धात गुंतलेली असतानाच या देशाचे राष्ट्राध्यक्ष डोनाल्ड ट्रम्प यांच्यापुढे देशातच मोठे आव्हान निर्माण झाले आहे. डोनाल्ड ट्रम्प यांच्याविरोधात लाखो लोक रस्त्यावर उतरले असून तिथे ‘नो किंग्स’ आंदोलनाचे लोण देशभरात पसरले आहे. त्यामुळे आता ट्रम्प यांच्यापुढे एकीकडे युद्ध आणि दुसरीकडे देशांतर्गत निर्माण झालेला असंतोष अशी दोन आव्हानं उभी राहिल्याचे बोलले जात आहे.
अमेरिकेत नेमकं काय घडतंय?
मिळालेल्या माहितीनुसार अमेरिकेत सध्या डोनाल्ड ट्रम्प यांच्याविरोधात लोकांमध्ये मोठा असंतोष निर्माण झाला आहे. अमेरिकेतील सर्वच 50 राज्यांमध्ये शनिवारी (28 मार्च) लाखो लोक रस्त्यावर उतरले. तिथे नो किंग्स म्हणजेच कोणीही राजा नाही नावाचे आंदोलन सुरू झाले आहे. या आंदोलनाच्या माध्यमातून शनिवारी संपूर्ण अमेरिकेत वेगवेगळ्या रॅलींचे आयोजन करण्यात आले. याच आंदोलनाच्या माध्यमातून ट्रम्प यांच्याविरोधात घोषणाबाजी करण्यात आली. नो किंग्स आंदोलनात याआधी दोन वेळा रॅलींचे आयोजन करण्यात आलेले आहे. अगोदर जून 2025 मध्ये आयोजित करण्यात आलेल्या रॅलीत साधारण 50 लाख लोकांनी सहभाग घेतला होता. त्यानंतर ऑक्टोबर 2025 मध्ये आयोजित करण्यात आलेल्या अशाच रॅलीत 70 लाख लोकांनी सहभाग घेतला होता. यावेळच्या तिसऱ्या नो किंग्ज आंदोलनात 90 लाख लोक सहभागी झाले होते.
लोक ट्रम्प यांच्याविरोधात का भडकलेत?
डोनाल्ड ट्रम्प यांच्याविरोधात तेथील लोक वेगवेगळ्या कारणांमुळे नाराज आहेत. डोनाल्ड ट्रम्प यांच्या इमिग्रेशन पॉलिसीला तेथील लोक विरोध करत आहेत. तसेच इराणविरोधात सुरू असलेल्या युद्धालाही तेथे काही लोकांकडून विरोध होतोय. तृतीयपंथीयांचे अधिकार कमी केले जात आहेत, अशी एक भावना तेथील लोकांत आहे. सोबतच श्रीमंत लोकांच्या वाढत्या प्रभावामुळेही अमेरिकन नागरिकांच्या मनात असंतोष निर्माण झाला आहे. त्यामुळे भविष्यात काय होणार, ते पाहणे महत्त्वाचे ठरणार आहे.
