US-Iran Update : इराणला वाकवण्यासाठी अमेरिकेने बाहेर काढलं आपलं खास अस्त्र डार्क ईगल, या शस्त्रामध्ये असं काय खास?

अमेरिका-इराण युद्धात सीजफायर लागू आहे. खरंतर या काळात युद्धावर तोडगा निघायला पाहिजे होता. पण अजून असं काही घडलेलं नाही. उलट पुन्हा लवकरच युद्ध सुरु होईल असे संकेत मिळत आहेत. अमेरिकेने आपलं सर्वात आधुनिक शस्त्र डार्क ईगल मध्य पूर्वेत तैनात करण्याची तयारी सुरु केली आहे. हे शस्त्र म्हणजे अमेरिकन सैन्याची पहिली हायपरसोनिक मिसाइल सिस्टिम आहे. अधिकृतरित्या हे अमेरिकेचं लॉन्ग रेंज हायपरसोनिक वेपन आहे. अलीकडेच यूएस सेंट्रल कमांडने पेंटागनकडे ही मिसाइल सिस्टिम मध्य पूर्वेत पाठवण्याची विनंती केली होती. इराणच्या बॅलेस्टिक मिसाइल लॉन्चरवर हल्ला करण्यासाठी खास हे शस्त्र मागवण्यात आलं आहे.

अमेरिकेची शस्त्रांची रेंज पोहोचणार नाही अशा ठिकाणी इराणने आपले ट्रान्सपोर्टर इरेक्टर लॉन्चर नेऊन ठेवले आहेत. विद्यमान प्रिसीजन स्ट्राइक मिसाइलची मारक क्षमता 500 किलोमीटर आहे. अशावेळी डार्क ईगलची गरज पडली आहे. डार्क ईगल एक हायपरसोनिक मिसाइल आहे. ध्वनीपेक्षा पाच पट जास्त वेगाने हे क्षेपणास्त्र आपल्या लक्ष्याच्या दिशेने झेपावते. 6174 किलोमीटर प्रतितास मिसाइलचा वेग आहे. याची रेंज 2,780 किलोमीटर पेक्षा जास्त आहे. या मिसाइलमध्ये एक ग्लाइड बॉडी आहे. हवेत पूर्णपणे अनपेक्षितपणे हे मिसाइल गिरक्या घेऊ शकतं.

हे मिसाइल खास का बनवण्यात आलय?

सामान्य मिसाइलपेक्षा याचा वेग जास्त आहे. शत्रुचे रडार, एअर डिफेन्स सिस्टिम या मिसाइलला पकडू शकत नाही. अंडरग्राऊंड सुविधा, जमिनीखाली कमांड सेंटर आणि चालते-फिरते मोबाइल लॉन्चर नष्ट करण्यासाठी या मिसाइलची रचना करण्यात आली आहे.

पुन्हा युद्धासाठी तिन्ही देश सज्ज

फेब्रुवारी 2026 च्या अखेरीस ऑपरेशन एपिक फ्युरीची सुरुवात झालेली. इराण विरुद्ध युद्ध सुरु केल्यानंतर मिसाइल, ड्रोन्स, नौदल तळ आणि सैन्य ठिकाणांवर हल्ले करण्यात आले. इराणकडे अजून किती मिसाइल स्टॉक शिल्लक आहे, याची कल्पना नाहीय. पुन्हा युद्धासाठी तिन्ही देश सज्ज आहेत. सध्या धमक्यांचं सत्र सुरु आहे. या युद्धात अमेरिका-इराणला अजून आपलं उद्दिष्टय साध्य करता आलेलं नाही. इराणमध्ये ना सत्ता बदल झाला, ना त्यांचं संवर्धित युरेनियम ताब्यात घेता आलं.