इम्रान खानला फाशी होणार की जन्मठेप! लष्कर कायद्यान्वये दोन गुन्हे दाखल

लाहोर : पाकिस्तानचे माजी पंतप्रधान आणि पाकिस्तान तेहरीक-ए-इन्साफचे (पीटीआय) प्रमुख इम्रान खान यांच्या अडचणी दिवसेंदिवस वाढत चालल्या आहेत. इम्रानवर आर्मी अॅक्ट अंतर्गत दोन गुन्हे दाखल करण्यात आले आहेत. इम्रान खान यांना दोन प्रकरणात नामनिर्देशित करण्यात आले असून ही दोन्ही प्रकरणे 9 मे रोजी झालेल्या भीषण हिंसाचारावर आधारित असल्याचे सांगण्यात आले आहे. त्यामुळे इम्रान खान यांनी लाहोर उच्च न्यायालयात सर्व प्रकरणांमध्ये अटकपूर्व जामिनासाठी याचिका दाखल केली आहे. मात्र त्यावर उच्च न्यायालयाने आपला निर्णय राखून ठेवला असल्याचे सांगण्यात आले आहे.

इम्रान खान यांच्याबाबत सूत्रांनी दिलेल्या माहिती प्रमाणे जिना हाऊस आणि गुलबर्ग अस्करी टॉवर प्रकरणांची आर्मी कायद्यांतर्गत चौकशी केली जाणार असल्याचे सांगितले आहे.

इम्रान खान यांच्याव्यतिरिक्त, पीटीआयचे नेते एजाज चौधरी, हम्माद अझहर उमर सरफराज चीमा, शाह मेहमूद कुरेशी, मुराद सईद, असद उमर, डॉ. यास्मिन रशीद, मियां मेहमूद उर रशीद आणि 50 हून अधिक जणांना उमेदवारी देण्यात आली आहे.

या दोन्ही प्रकरणांमध्ये दहशतवादासह आणखी 19 कलमे लावण्यात आली आहेत. ज्यामध्ये देशद्रोह आणि पाकिस्तानी सैन्याविरोधात घोषणाबाजीची कलमेही समाविष्ट करण्यात आली आहेत.

सूत्रांनी दिलेल्या माहितीनुसार, या दोन्ही प्रकरणातील आरोपींना अटक केल्यानंतर पोलीस त्यांना पाकिस्तानी लष्कराच्या ताब्यातही देण्याची शक्यता वर्तवली जात आहे.

इम्रान खान यांना पाकिस्तानी रेंजर्सनी इस्लामाबाद हायकोर्टातून 9 मे रोजी अटक करण्यात आली होती. इम्रान त्याच्याविरुद्ध प्रलंबित असलेल्या दोन खटल्यांमध्ये हजर राहण्यासाठी तेथे गेला होता.

इम्रान खानच्या अटकेनंतर पाकिस्तानात अनेक ठिकाणी हिंसक दंगली उसळल्या होत्या. त्यामुळे आंदोलनादरम्यान 47 जणांचा मृत्यू झाला असून 1100 हून अधिक लोक जखमी झाल्याचा दावा पीटीआयने केला आहे.

अटकेच्या वेळी इम्रान खानने लाहोर उच्च न्यायालयात त्याच्यावर सुरू असलेल्या सर्व खटल्यांमध्ये अटकपूर्व जामिनासाठी याचिका दाखल करण्यात आली होती.

मात्र लाहोर उच्च न्यायालयाने मंगळवारी याबाबतचा निर्णय राखून ठेवला असून न्यायालयाकडून अद्याप त्यावर निर्णय देण्यात आला नाही.