Epstein Files : एपस्टिन फाईलने जग हादरलं, या देशात भूकंप, पंतप्रधानाचा जाणार पहिला बळी

अमेरिकन लैंगिक गुन्हेगार जेफ्री एपस्टीनशी संबंधित फाईल्समुळे सध्या जगभरात गदारोळ माजला आहे, अनेक भूकंप होत आहेत. त्यामुळे आंतरराष्ट्रीय राजकारणातही मोठी खळबळ माजली आहे. याचे पडसाद आता ब्रिटनमध्येही उमडायला लागले असून ब्रिटिश पंतप्रधान कीर स्टार्मर यांना त्यांच्याच पक्षात वाढत्या दबावाचा सामना करावा लागत आहे. पीटर मँडेलसन आणि कुख्यात लैंगिक गुन्हेगार जेफ्री एपस्टाईन यांच्यातील संबंधांची माहिती होती, तरीही त्यांनी मँडेलसन यांना अमेरिकेत ब्रिटनचे राजदूत म्हणून नियुक्त केले असे स्टार्मर यांनी कबूल केलं. यामुळे वातावरण चांगलंच तापलं आहे. स्टार्मर यांची  खुर्ची धोक्यात येऊ शकते. बुधवारी ब्रिटिश संसदेत घडलेल्या तीव्र घटनांवेळी लेबर पक्षाच्या खासदारांचा राग स्पष्टपणे दिसून आला. स्टार्मरच्या नेतृत्वाखालील सरकार हाऊस ऑफ कॉमन्समध्ये (ब्रिटिश संसदेचे कनिष्ठ सभागृह) पराभवाच्या उंबरठ्यावर पोहोचलं.

लेबर पार्टीच्या नेत्यांनी मेग हिलियर आणि अँजेला रेनर यांनी शेवटच्या क्षणी केलेल्या सुधारणांनंतर, सरकारला मँडेलसनच्या नियुक्तीशी संबंधित कागदपत्रे जाहीर करण्यास सहमती दर्शवावी लागली. अमेरिकेतील ब्रिटनचे राजदूत म्हणून पीटर मँडेलसन यांच्या नियुक्तीशी संबंधित कागदपत्रे सार्वजनिक करण्याच्या बाजूने कामगार खासदारांनी मतदान केले. कागदपत्रे प्रसिद्ध केल्याने कीर स्टार्मरसाठी एक गंभीर आव्हान निर्माण होऊ शकते असा इशारा संतप्त कामगार खासदारांनी दिला. विशेषतः मँडेलसनचा पोलिस तपास सुरू असताना ही परिस्थिती आणखी चिघळू शकते.

मँडेलसनची अमेरिकेत ब्रिटनचे राजदूत म्हणून नियुक्ती होण्यापूर्वी त्याच्या एपस्टाईनशी असलेल्या मैत्रीची आपल्याला माहिती होती हे पंतप्रधान कीर स्टार्मर यांनी प्रश्नोत्तराच्या तासादरम्यान कबूल केलं . मात्र नंतर या निर्णयाचा पश्चात्ताप झाल्याचं त्यांनी सांगितलं. त्यांनी मँडेलसनवर एपस्टाईनशी असलेल्या त्याच्या संबंधांबद्दल वारंवार खोटे बोलल्याचा आरोप केला.  एपस्टाईन फाइल्समधील मँडेलसनबद्दलच्या खुलाशांमुळे मी इतरां इतकाच संतापलो आहे, असं स्टार्मर म्हणाले.  हे “पूर्णपणे धक्कादायक आणि लज्जास्पद” असल्याचंही त्यांनी सांगितलं.  ले. किंग चार्ल्स-III यांच्या संमतीने मँडेलसन यांना रॉयल ॲडव्हायझरी कौन्सिलमधून देखील काढून टाकण्यात आले आहे याची पुष्टी स्टार्मर यांनी केली.

लेबर पार्टीतून मँडेलसनचा राजीनामा

माजी पंतप्रधान टोनी ब्लेअर आणि गॉर्डन ब्राउन यांच्या सरकारमधील मंत्री पीटर मँडेलसन यांनी 3 फेब्रुवारी रोजी हाऊस ऑफ लॉर्ड्समधून राजीनामा दिला, पक्षावर आणखी लाजिरवाणे व्हायची वेळ येऊ नये असं त्यांना वाटत होतं. अमेरिकेच्या न्याय विभागाने अलीकडेच प्रसिद्ध केलेल्या कागदपत्रांमध्ये मँडेलसनची एपस्टाईनशी जवळीक, ईमेल चॅट आणि संवेदनशील सरकारी कागदपत्रे शेअर करण्याचे आरोप उघड झाले आहेत. एका फोटोमध्ये तर मँडेलसन फक्त अंडरवेअर आणि टी-शर्टमध्ये दिसत आहे ज्यामध्ये सोबत असलेली एक महिला बाथरोबमध्ये दिसते.

2024 च्या अखेरीस कीर स्टार्मर यांनी मँडेलसन यांची अमेरिकेतील ब्रिटनचे राजदूत म्हणून नियुक्ती केली, परंतु एपस्टाईनशी त्यांचे सततचे संबंध असल्याचे पुरावे समोर आल्यानंतर सात महिन्यांतच त्यांना पदावरून काढून टाकण्यात आले.

मँडेलसन यांची लॉर्ड ही पदवी देखील काढून घेतली जाईल आणि सरकार त्यासाठी कायदा आणण्याची तयारी करत आहे. एवढंच नव्हे तर कामगार पक्षात नेतृत्व संकट निर्माण होण्याची शक्यता वाढत असताना, येत्या काळात अधिक कागदपत्रे उघड झाल्यास राजकीय संकट आणखी वाढू शकते असे काही खासदारांचे म्हणणे आहे.