होर्मुजच्या खाडीत भयानक घडलं, शांतता चर्चेसाठी पायघड्या घालणाऱ्या पाकलाच अमेरिकेचा मोठा दणका, 2 जहाजं

इराण-अमेरिकेत 40 दिवसांच्या संघर्षानंतर सध्या 2 आठवड्यांचा युद्धविराम असून, दोन्ही देशांमध्ये या आठवड्याअखेरीस पुन्हा चर्चा होणार आहे. गेल्या आठवड्यात इस्लामाबादमध्ये अमेरिका-इराणमध्ये झालेली चर्चा फिस्कटल्यानंतर राष्ट्र्ध्यक्ष ट्रम्पनी आक्रमक भूमिका घेतली. त्यांनी होर्मुजच्या सामुद्रधुनीची लगेच नाकेबंदी केली, ज्यामुळे अनेक देशांची वाहतूक रोखली गेली आणि त्यांना फटका बसला. मात्र याबाबत आता आणखी एक धक्कादायक अपडेट समोर आली आहे. इराण-अमेरिका युद्धविरामात आणि शांतता चर्चेसाठी ज्यांनी महत्वाची भूमिका निभावली, त्या पाकिस्तानलाच आता अमेरिकेने मोठा झटका दिला आहे.

अमेरिकेने होर्मुझच्या सामुद्रधुनीतून दोन पाकिस्तानी जहाजांना परत पाठवले आहे. हा पाकिस्तानसाठी एक मोठा धक्का मानला जात आहे. कारण पाकिस्तानने, इराण आणि अमेरिका यांच्यात शांतता करार घडवून आणण्यात सक्रियपणे सहभाग नोंदवला होता. चीनसह अनेक देशांची 20 जहाजे कोणत्याही भीतीशिवाय होर्मुझच्या सामुद्रधुनीतून गेली असताना, अमेरिकेने दोन पाकिस्तानी जहाजे परत पाठवली. मात्र पाकिस्तानी सरकारने यावर अधिकृत प्रतिक्रिया देण्यास नकार दिला आहे.

पाकिस्तानची जहाज पाठवली माघारी

अल अरबियाच्या वृत्तानुसार, पाकिस्तानी ध्वज लावलेल्या दोन जहाजांनी मंगळवारी होर्मुझच्या सामुद्रधुनीतून बाहेर पडण्याचा प्रयत्न केला, परंतु अमेरिकी सैन्याने त्यांना परत पाठवलं. एकीकडे चीन आणि इतर देशांची जहाजे त्याच मार्गावरून प्रवास करत होती. मात्र त्याचवेली पाकिस्तानच्या जहाजांना मात्र पुढे जाता आलं नाही.

पाकिस्तानच्या जहाजांना मिळाले पास

खरंतर इराणने पाकिस्तानला होर्मुझच्या सामुद्रधुनीतून जहाजांच्या वाहतुकीसाठी 20 पास मार्ग दिले आहेत. या मार्गांमधून पाकिस्तानी जहाजे सुरक्षितपणे बाहेर काढण्याचे आश्वासन इराणने दिलं होतं. पाकिस्तानने यापैकी चार मार्गांचा वापर आधीच केला आहे, पण आता अमेरिकेने पाकला मोठा धक्का दिला आहे.

पाकिस्तानच्या जहाज वाहतूक विभागातील एका अधिकाऱ्याने अल अरबियाला दिलेल्या माहितीनुसार, “इराणने मार्ग रोखला होता तेव्हाही आम्हाला फारशी चिंता वाटली नव्हती. माच्र आता अमेरिकेने आमची जहाजे परत पाठवली आहेत.”

‘इतर देशांप्रमाणेच पाकिस्तानही अडचणींचा सामना करत आहे. आम्ही सातत्याने संवाद साधत असून समस्येवर तोडगा काढण्याचा प्रयत्न करत आहोत’, असं पाकिस्तानचे नौकानयन मंत्री जुनैद अन्वर चौधरी म्हणाले .

होर्मुजमधून बेधडक निघाली 20 जहाजं

गेल्या आठवड्यात इराणशी बोलणी फिस्कटल्यानंतर अमेरिकेने होर्मुझच्या बाहेर नाकेबंदी जाहीर केली. त्याचाच एक भाग म्हणून, अमेरिकेने ओमानच्या आखातात आणि अरबी समुद्रात10 हजारांचं सैन्य तैनात केलंय. असं असूनही, नाकेबंदीच्या पहिल्याच दिवशी 20 जहाजे कोणत्याही भीतीशिवाय या मार्गावरून गेली. वॉशिंग्टन पोस्टच्या वृत्तानुसार, अमेरिकन सैन्याने केवळ सहा जहाजं अडवली. विशेष म्हणजे, यापैकी दोन जहाजे पाकिस्तानची होती अशी माहिती समोर आली आहे. पाकिस्तानसाठीही हा एक मोठा धक्का मानला जात आहे, कारण अवघ्या दोन दिवसांनी इस्लामाबादमध्ये इराण आणि अमेरिका यांच्यात शांतता करारावर पुन्हा चर्चा होणार आहे.

अमेरिकेच्या या कृतीनंतर, जहाजं अडवली गेल्यानंतर आता पाकची भूमिका काय असेल हे पाहणं महत्वाचं ठरेल.