हेलिकॉप्टर पायलट बनायचंय? शिक्षणाचा खर्च किती, पगार किती? जाणून घ्या
हेलिकॉप्टर पायलट बनणे हे केवळ रोमांचकच नाही तर ते एक प्रतिष्ठित आणि चांगल्या पगाराचे करिअर देखील आहे. हेलिकॉप्टर पायलट कसे बनायचे, त्यासाठी शिक्षण कसे घ्यायचे, त्याची फी किती? नोकरीत किती पगार मिळतो. याबद्दल जाणून घेऊयात.
देशाची सेवा असो किंवा खाजगी क्षेत्रातील करिअर असो, हेलिकॉप्टर पायलटची भूमिका खूप महत्त्वाची मानली जाते. डोंगराळ भागात मदत आणि बचाव कार्यापासून ते व्हीआयपी हालचाली आणि कॉर्पोरेट प्रवासापर्यंत, हेलिकॉप्टर पायलटची मागणी सतत वाढत आहे. जर तुम्हीही आकाशात उडण्याचे स्वप्न पाहत असाल आणि पदवीसह याला आपलं करिअर बनवू इच्छित असाल तर हेलिकॉप्टर पायलट बनणे तुमच्यासाठी एक उत्तम पर्याय असू शकतो. पण हेलिकॉप्टर पायलट कसे व्हावे, त्यासाठी कोणते शिक्षण घेणे गरजेचं असतं. कोर्स कुठून करता येतो आणि पायलट म्हणून किती पगार मिळतो ते जाणून घेऊयात.
शैक्षणिक पात्रता आणि पूर्वतयारी हेलिकॉप्टर पायलट होण्यासाठी, किमान 12 वी उत्तीर्ण असणे आवश्यक आहे (भौतिकशास्त्र, गणित आणि इंग्रजीसह) आणि उमेदवाराचे वय किमान 17 वर्षे असावे. या पात्रतेव्यतिरिक्त, काही संस्था वैद्यकीय फिटनेस प्रमाणपत्र (डीजीसीए वर्ग I किंवा वर्ग II) देखील मागतात.
अभ्यासक्रम कोणते आहेत? हेलिकॉप्टर पायलट होण्यासाठी दोन मुख्य कोर्स आहेत आणि हे अभ्यासक्रम किंवा कोर्स साधारणपणे 12 ते 18 महिन्यांत पूर्ण केले जातात.
हेलिकॉप्टरचे खाजगी पायलट परवाना – हा एक नवीन शिकणाऱ्यांसाठीचा परवाना आहे जो 40 ते 60 तासांच्या उड्डाण प्रशिक्षणानंतर मिळतो.
कमर्शियल पायलट लायसन्स (हेलिकॉप्टर)- यासाठी एकूण 150 तासांचे उड्डाण प्रशिक्षण आवश्यक आहे, ज्यामध्ये एकट्याने उड्डाण करणे, रात्री उड्डाण करणे आणि नेव्हिगेशनचे प्रशिक्षण समाविष्ट आहे.
भारतातील प्रमुख हेलिकॉप्टर प्रशिक्षण संस्था
1) इंदिरा गांधी इन्स्टिट्यूट ऑफ एरोनॉटिक्स, चंदीगड 2) राजीव गांधी एव्हिएशन अकादमी, हैदराबाद 3) पवन हंस हेलिकॉप्टर लिमिटेड प्रशिक्षण संस्था, मुंबई/नवी दिल्ली 4) इंदिरा गांधी इन्स्टिट्यूट ऑफ एव्हिएशन सायन्सेस, रायबरेली
कोर्स फी किती आहे? भारतात खाजगी पायलट परवान्यासाठी फी 10 लाख ते 20 लाख रुपयांपर्यंत असू शकते. तथापि, वेगवेगळ्या फ्लाइंग स्कूल आणि प्रशिक्षणाच्या कालावधीनुसार फीची रक्कम बदलू शकते. त्याच वेळी, व्यावसायिक हेलिकॉप्टर पायलट प्रशिक्षणाचा खर्च 25 लाख रुपयांपासून 40 लाख रुपयांपर्यंत असू शकते, ज्यामध्ये उड्डाण प्रशिक्षण, ग्राउंड स्कूलिंग, सिम्युलेटर प्रशिक्षण इत्यादींचा समावेश आहे.
नोकरी कुठे मिळेल? अभ्यासक्रम पूर्ण केल्यानंतर आणि पायलट परवाना मिळवल्यानंतर, उमेदवारांना अनेक कंपन्यांमध्ये नोकरी मिळू शकते, ज्यामध्ये सरकारी आणि खाजगी दोन्ही कंपन्या समाविष्ट आहेत. सरकारी कंपन्यांमध्ये ओएनजीसीचा समावेश आहे, तर खाजगी कंपन्यांमध्ये पवन हंस, चार्टर्ड हेलिकॉप्टर सेवा कंपन्या आणि वैद्यकीय आपत्कालीन सेवा म्हणजेच एअर अॅम्ब्युलन्स इत्यादींचा समावेश आहे.
किती पगार मिळू शकेल? पगाराबद्दल बोलायचं झालं तर, फ्रेशर म्हणून, हेलिकॉप्टर पायलटला दरमहा 40 हजार ते 80 हजार रुपये पगार मिळू शकतो. तथापि, वाढत्या अनुभवासह, हा पगार 2 लाख ते 5 लाख रुपयांपर्यंत वाढू शकतो.
