काही गोष्टी सांगता येत नाहीत, सुसाईड नोट लिहून Atlas सायकल कंपनीच्या मालकिणीची आत्महत्या

नवी दिल्ली : प्रसिद्ध सायकल कंपनी अॅटलसचे (Atlas Cycle Company) मालक संजय कपूर यांच्या पत्नी नताशा (वय 57) यांचा संशयास्पद मृत्यू झाला आहे (Natasha Kapoor Suicide). प्राथमिक तपासात पोलिसांनी ही आत्महत्या असल्याची शक्यता वर्तवली आहे. पोलिसांना घटनास्थळावरुन सुसाईड नोट आढळून आली. ‘काही गोष्टी अशा आहेत ज्या सांगता येत नाहीत, मुलांची काळजी घ्या’, असं आ सुसाईड नोटमध्ये लिहिण्यात आलं आहे. मात्र, ज्या खोलीत नताशा यांनी आत्महत्या केली त्या खोलीचा दरवाजा उघडा होता, त्यामुळे पोलीस वेगवेगळ्या बाजूने या प्रकरणाचा तपास करत आहेत (Natasha Kapoor Suicide).

पोलिसांनी दिलेल्या माहितीनुसार, अॅटलस कंपनीचे मालक संजय कपूर हे त्यांच्या कुटुंबासोबत दिल्लीच्या 3 औरंगजेब लेनमध्ये राहतात. मंगळवारी दुपारच्या जेवणाला नताशा आल्या नाहीत. त्यामुळे कुटुंबियांनी त्यांचा शोध घेतला, त्यांना फोन केला. मात्र, त्यांनी फोन उचलला नाही. त्यानंतर नताशा या त्यांच्याच खोलीत मृतावस्थेत आढळल्या. त्यांचा मृतदेह ओढणीच्या सहाय्याने पंख्याला लटकलेल्या अवस्थेत आढळला. कुटुंबियांनी ओढणीला कापून नताशा यांचा मृतदेह खाली उतरवला. त्यानंतर डॉक्टरांना बोलावण्यात आलं. मात्र, डॉक्टरांनी नताशा यांना मृत घोषित केलं.

सध्या तुघलक रोड पोलिसांची गुन्हे शाखा या प्रकरणी तपास करत आहे. मात्र, नताशा यांनी आत्महत्या केली, की त्यांच्यासोबत आणखी काही घडलं हे शवविच्छेदन अहवालानंतर स्पष्ट होणार आहे. पोलिसांच्या मते, आर्थिक चणचण या आत्महत्येचं कारण असू शकतं. बुधवारी नताशा कपूरच्या मृतदेहाचं शवविच्छेदन आरएमएल रुग्णालयात करण्यात आलं. त्यानंतर त्यांच्या मृतदेह कुटुंबियांना सोपवण्यात आला, लोधी रोड येथील स्मशान भूमीत नताशा यांचे अंतिम संस्कार झाले.