कंत्राटदाराचा टेंडरवरुन वाद, खुन्नस काढण्यासाठी अधिकाऱ्याच्या हत्येची सुपारी, वर्ध्यातील धक्कादायक घटना

वर्धा : कंत्राटावरुन वाद झाला म्हणून एका कंत्राटदाराने वर्धा पंचायत समितीचे विस्तार अधिकारी हेमंत देवतळे यांच्या हत्येची सुपारी दिल्याची धक्कादायक माहिती समोर आली. विस्तार अधिकाऱ्याला जीवे मारण्याची सुपारी देणाऱ्या कंत्राटदाराचं नाव अमोल वनकर असं आहे. दीड महिन्यांपूर्वी एका नराधमाने देवतळे यांच्यावर चाकू हल्ला केला होता. या हल्ल्यात ते गंभीर जखमी झाले. या हल्ल्याच्या मुख्य आरोपीस जेरबंद करण्यात पोलिसांना अखेर यश आलं आहे (Contractor plotted to kill officer in Wardha).

कोरोनाच्या पार्श्वभूमीवर उपाययोजना करण्यासाठी वर्धा पंचायत समितीचे विस्तार अधिकारी हेमंत देवतळे यांच्यावर अनेक जबाबदाऱ्या आहेत. कोव्हिड सेंटरवर बेडशीट, सॅनिटायझर, मास्क तसेच इतरही साहित्य पुरवठा तसेच इतर कामांसाठी कंत्राटदारांना टेंडर दिलं जातं. याबाबत कंत्राटदारांना टेंडर देण्याची जबाबदारी हेमंत देवतळे यांची आहे (Contractor plotted to kill officer in Wardha).

Mahafast 100 | बुलेटच्या वेगाने 100 बातम्या, ‘महाफास्ट’ रोज रात्री 7.56 वा. टीव्ही 9 मराठीवर 

दरम्यान, एका टेंडरवरुन हेमंत देवतळे यांचा कंत्राटदार अमोल वनकर आणि त्याच्या सहकाऱ्यांसोबत वाद झाला. टेंडर प्रक्रियेत अडसर ठरणाऱ्या अधिकाऱ्याला भीती दाखवत शांत करण्याच्या उद्देशाने अमोल वनकरने मित्र तारीख शेखसोबत देवतळे यांच्यावर चाकू हल्ला घडवून आणला. यासाठी तारीख शेखने कुणाल इखार या इसमाला 40 हजारांची सुपारी दिली.

हल्लेखोर कुणाल इखारला रिक्षा घेण्यासाठी पैशांची गरज होती. त्यासाठी त्याने तारीख शेखकडे पैशांची मदत मागितली. त्याचवेळी अमोल वनकर आणि शेख विस्तार अधिकाऱ्याविरोधात कट रचत होते. तारीख शेखने विस्तार अधिकारी हेमंत देवतळे यांच्यावर चाकू हल्ला केल्यास 40 हजार देऊ, असं कुणाला इखारेला सांगितलं. त्यासाठी कुणाला इखार तयार झाला, असं पोलीस तपासात उघड झालं आहे.

कुणाला इखारने ठरल्याप्रमाणे अधिकारी हेमंत देवतळे यांच्या घरी जाऊन चाकू हल्ला केला. याप्रकरणाचा तपास पोलीस गेल्या दीड महिन्यांपासून करत होते. अखेर या तपासाला यश आलं. पोलिसांनी कुणाल इखार, तारीख शेख आणि कंत्राटदार अमोल वनकरला अटक केली आहे. याप्रकरणाची सध्या वर्धा जिल्ह्यात चर्चा सुरु आहे.