‘अॅक्शन का स्कूल टाइम…’मधला हा चिमुरडा आता काय करतो?

मुंबई : जाहिरातींच्या जिंगल्स नेहमीच आपल्या ओठांवर सहज रुळतात. नव्वदच्या दशकातील अनेक जाहिराती तुमच्या आजही स्मरणात असतील. मग ती मॅगी असो, बोर्नव्हिटा असो किंवा फेविकॉल. आणखी एका जाहिरातीचं गाणं तुम्ही कायम गुणगुणलं असेल, ते म्हणजे ‘अॅक्शन स्कूल टाइम शूज’चं. (Action School Time Shoes)

‘अॅक्शन का स्कूल टाइम…’ हे चार शब्द ऐकूनच नव्वदच्या दशकातील अनेक आठवणी तुमच्या मनात ताज्या झाल्या असतील. कित्येक जणांच्या डोक्यात तर जाहिरातीचं जिंगलही वाजायला सुरुवात झाली असेल.

‘(गजराचा आवाज) ओ हो हो स्‍कूल टाइम अ‍ॅक्‍शन का स्‍कूल टाइम… प्रेयर्ज होती एव्हरी मॉर्निंग स्टाईल से होती सबकी चेकिंग क्‍लासवर्क, होमवर्क, पनिशमेंट लेक्‍चर.. गुड… गुड मॉर्निंग टीचर फायटिंग, फ्रेण्डशीप, मस्ती, पीटी बजी बेल और हो गयी छुट्टी ओ हो हो स्‍कूल टाइम अ‍ॅक्‍शन का स्‍कूल टाइम…’

या जाहिरातीत झळकलेला कुरळ्या केसांचा मुलगा आजही तुमच्या लक्षात असेल. टाय बांधणाऱ्या, शू पॉलिश करणाऱ्या आणि जाहिरातभर मस्ती करणाऱ्या या चिमुरड्याचं नाव आहे तेजन दिवानजी (Tejan Diwanji). अॅक्शनसोबतच मॅगी, बँड-एडसारख्या अनेक ब्रँड्सच्या जाहिरातींमध्ये तो झळकला होता. ‘पहला नशा’ गाण्याच्या रिमिक्समध्येही तो दिसला होता.

बरेचसे बालकलाकार मनोरंजन विश्वात पुनरागमन करत असताना वीस वर्षांपेक्षा अधिक काळ लोटल्यानंतर तेजन कुठे दिसला नाही. तेव्हा अनेक जणांनी त्याला शोधण्याचा प्रयत्न केला. मात्र तेजनने मनोरंजन विश्वाला रामराम ठोकला.

तेजन आता डॉ. तेजन दिवानजी झाला आहे. त्याने अमेरिकेतील ‘द युनिव्हर्सिटी ऑफ मेरिलँड मेडिकल सेंटर’मध्ये (The University of Maryland Medical Center) वैद्यकीय उच्चशिक्षण घेतलं. मेरिलँडमधील बाल्टिमोरमध्ये रेडिएशन ऑन्कोलॉजी (Radiation Oncology) विभागात तो कार्यरत आहे. कॅन्सरवर उपचार करताना वापरण्यात येणाऱ्या रेडिएशन उपचारांचा तो तज्ज्ञ आहे.