कॉलेज कँटीनमधून पिझ्झा-बर्गर हद्दपार, प्राध्यापकांवर देखरेखीची जबाबदारी

नागपूर : कॉलेजच्या कँटीनमध्ये पिझ्झा-बर्गर (Pizza Burger) खाण्याची सवय असलेल्या विद्यार्थ्यांची आता अडचण होणार आहे. कारण महाविद्यालयातील उपाहारगृहांमध्ये पिझ्झा आणि बर्गरची नाकाबंदी करण्यात आली आहे. महाविद्यालयातील कँटीनमध्ये यासारखे खाद्यपदार्थ दिसल्यास प्राध्यापक आणि कँटीनचालकावर कारवाई होणार आहे. नागपूर विभागातल्या तब्बल 265 महाविद्यालयांना अन्न आणि औषध प्रशासन विभागाने याबाबत पत्रंही पाठवलं आहे.

आजकाल सुपरफास्टचा जमाना आहे. त्यामुळे बरेच विद्यार्थी महाविद्यालयात जाताना घरचा डबा घेऊन जात नाहीत. महाविद्यालयातील कँटिनमध्ये पिझ्झा आणि बर्गरसारख्या खाद्यपदार्थावर ताव मारण्यास ते पसंती देतात. पण आता नव्या नियमानुसार महाविद्यालयातून पिझ्झा आणि बर्गरला बाहेरचा रस्ता दाखवण्यात आला आहे. नागपूर शहरातील 68, तर विभागातील 265 महाविद्यालयांना याबाबत अन्न आणि औषध विभागाने पत्रं पाठवलं आहे.

महाविद्यालयातील कँटीनमध्ये जी मुलं रोज पिझ्झा आणि बर्गरवर ताव मारतात, ते विद्यार्थी अन्न विभागाच्या या नव्या निर्णयाचा विरोध करत आहेत. काही जणांनी मात्र महाविद्यालयात पिझ्झा आणि बर्गरच्या नाकाबंदीचं समर्थन केलं आहे.

अन्न आणि औषध प्रशासन विभागाचे अधिकारी आणि कर्मचारी महाविद्यालयातील कँटीन्सवर लक्ष ठेवणार आहेत. जर महाविद्यालयातील कँटीनमध्ये पिझ्झा किंवा बर्गरसारखे पदार्थ आढळले, तर कँटीनचालकासह कॉलेजमधील प्राध्यापकांवरही कारवाईचा बडगा उगारला जाणार आहे.

तरुण पिढीत पिझ्झा आणि बर्गरची मोठी क्रेझ आहे. जिभेला चव म्हणून महाविद्यालयीन तरुण मोठ्या प्रमाणात जंक फूडच्या आहारी जातात. यामुळेच लठ्ठपणा आणि इतर आजारांनाही सुरुवात होते. यातून तरुणांना बाहेर काढण्यासाठी अन्न आणि औषध विभागाचे प्रयत्न सुरु आहे. त्यात किती यश मिळतं, हे येणारा काळच ठरवेल.