अलिबागमध्ये दिव्यांग मुलीवर लैंगिक अत्याचार, सात जण अटकेत

रायगड : दिव्यांग मुलीवर सात जणांनी वारंवार लैंगिक अत्याचार (Sexual assault with disabled girl) करुन तिला गरोदर केल्याची धक्कादायक घटना अलिबाग तालुक्यातील रेवदंडा येथे घडली आहे. या प्रकरणी रेवदंडा पोलीस ठाण्यात गुन्हा दाखल करण्यात आला आहे.

सातही आरोपींना पोलिसांनी अटक केली आहे. या आरोपींना आज अलिबाग न्यायालयाने 8 एप्रिलपर्यंत पोलीस कोठडी सुनावली आहे. या घटनेमुळे तालुक्यात खळबळ उडाली आहे (Sexual assault with disabled girl).

अलिबाग तालुक्यातील रेवदंडा गावात पीडित मुलगी आपल्या आई वडिलांसोबत राहते. ही मुलगी दिव्यांग आहे. याच गोष्टीचा फायदा घेऊन तिच्या परिसरात राहणाऱ्या सात जणांनी सात महिने वारंवार आळीपाळीने लैंगिक अत्याचार केला. त्यानंतर मुलीची तब्येत बिघडली. तिला त्रास जाणवू लागला.

पीडित मुलीच्या घरच्यांनी तिला डॉक्टरांकडे नेले. डॉक्टरांनी तपासले असता पीडित मुलगी ही गर्भवती असल्याचे डॉक्टरांनी पालकांना सांगितले. त्यानंतर हा प्रकार उघडकीस आला. यामध्ये परिसरातील सात जणांनी पीडित मुलीवर अत्याचार केल्याचे समोर आले आहे.

रेवदंडा पोलिसांनी सात जणांना तातडीने अटक केली असून त्यांच्यावर बलात्काराचा गुन्हा दाखल केला आहे. आज आरोपींना न्यायालयात हजर केले असता त्यांना 8 एप्रिल पर्यंत पोलीस कोठडी सुनावण्यात आली आहे. या गुन्ह्याचा तपास डीवायएसपी सोनाली कदम करीत आहेत.