भावना दुखावल्या, सांगू कोणाला? ‘झोमॅटो’च्या ‘त्या’ रायडरची हतबलता

जबलपूर : ‘झोमॅटो’च्या बिगर-हिंदू कर्मचाऱ्याकडून पदार्थाची डिलीव्हरी घेण्यास नकार देत जबलपूरमधील ग्राहकाने माज दाखवल्यानंतर सर्वच स्तरातून टीका होत आहे. त्यानंतर संबंधित मुस्लिम डिलीव्हरी एक्झिक्युटिव्हने आपल्या भावना दुखावल्या असल्या, तरी हतबल असल्याचं मत व्यक्त केलं आहे.

अमित शुक्ला यांच्यापर्यंत फूड डिलीव्हरी पोहचवण्याची जबाबदारी फैयाज नावाच्या फूड डिलीव्हरी एक्झिक्युटिव्हवर होती. मात्र शुक्ला यांनी डिलीव्हरी बॉय बिगर हिंदू असल्याचं कारण देत ऑर्डर रद्द केल्याचं ट्विटरवरुन जाहीर केलं होतं.

‘भावना दुखावल्या तर गेल्या आहेतच. पण काय बोलणार. लोक जे म्हणतील तेच योग्य असणार. आम्ही गरीब आहोत. सहन तर करावंच लागणार’ अशा भावना फैयाजने व्यक्त केल्या.

‘मी ऑर्डर करणाऱ्या व्यक्तीच्या घराचं लोकेशन जाणून घेण्यासाठी त्यांना (अमित शुक्ला) फोन केला. पण त्यांनी ऑर्डर कॅन्सल केल्याचं सांगितलं.’ असं फैजल म्हणाला.

काय आहे प्रकरण?

‘झोमॅटोवर नुकतीच एक ऑर्डर रद्द केली. त्यांनी मी मागवलेले पदार्थ पोहचवण्यासाठी बिगर हिंदू रायडरची नेमणूक केली होती. त्यांनी रायडर बदलण्यास असमर्थता दर्शवली. ऑर्डर रद्द केल्यास रिफंड देण्यासही नकार दिला. त्यावर, तुम्ही मला डिलीव्हरी घेण्यास जबरदस्ती करु शकत नाही, असं मी म्हटलं. मला परतावा नको. फक्त रद्द करा’ अशा आशयाचं ट्वीट शुक्लांनी मंगळवारी रात्री केलं होतं. टीकेचा सामना करावा लागल्यानंतर त्यांनी ट्विटर अकाऊण्ट डिलीट केलं.

अन्न हाच धर्म

झोमॅटो कंपनी डिलीव्हरी एक्झिक्युटिव्ह न बदलण्याच्या निर्णयावर ठाम राहिली. ‘अन्नाला धर्म नसतो. अन्न हाच एक धर्म आहे’ असं ट्वीट शुक्लांच्या अजब मागणीच्या ट्वीटला उत्तर देताना कंपनीच्या अधिकृत ट्विटर हँडलवरुन करण्यात आलं होतं.

Food doesn’t have a religion. It is a religion. https://t.co/H8P5FlAw6y

— Zomato India (@ZomatoIN) July 31, 2019

‘सध्या पवित्र श्रावण महिना सुरु आहे. त्यामुळे हा माझ्या वैयक्तिक निवडीचा प्रश्न आहे’ असं सांगत शुक्ला यांनी लंगडं समर्थन करण्याचा प्रयत्न केला.

संस्थापकांचा पाठिंबा

‘झोमॅटो’चे संस्थापक दीपेंदर गोयल यांनी कंपनीच्या निर्णयाला पाठिंबा दाखवला. ‘भारत या संकल्पनेचा आम्हाला अभिमान आहे. आमचे ग्राहक आणि भागिदारांमध्ये असलेल्या विविधतेची आम्हाला जाण आहे. आमच्या तत्त्वांच्या आड आल्याने एखादा व्यवहार गमवावा लागला, तर आम्हाला खेद नसेल.’ अशी भूमिका गोयल यांनी मांडली.

We are proud of the idea of India – and the diversity of our esteemed customers and partners. We aren’t sorry to lose any business that comes in the way of our values. ?? https://t.co/cgSIW2ow9B

— Deepinder Goyal (@deepigoyal) July 31, 2019

झोमॅटो आणि गोयल यांनी ट्विटरवर मांडलेल्या भूमिकेचं सर्वच स्तरातून स्वागत झालं. तर अमित शुक्ला यांच्या अनाठायी मागणीवर अनेकांनी टीकेची झोड उठवली होती.