उन्हाळ्यात कोणत्या रंगाचे कपडे घालावे? शरीराला थंडावा देण्यासाठी बेस्ट पर्याय कोणते?
उन्हाळ्यात उष्णतेचा त्रास कमी करण्यासाठी केवळ योग्य आहारच नाही, तर कपड्यांच्या रंगाची निवडही महत्त्वाची ठरते. कोणते रंग उष्णता शोषतात आणि कोणते परावर्तित करतात, याची शास्त्रोक्त माहिती आणि उन्हाळ्यासाठी उपयुक्त फॅशन टिप्स या लेखात पहा.
होळी झाल्यानंतर सर्वत्रच उकाडा वाढत चालला आहे. उन्हाळा सुरू झाला की घामामुळे आणि वाढत्या उष्णतेमुळे अंगाची लाहीलाही होते. अशावेळी आपण काय खातो आणि पितो यासोबतच आपण कोणत्या रंगाचे कपडे घालतो, यालाही मोठे महत्त्व असते. विज्ञानानुसार, काही विशिष्ट रंग उष्णता शोषून घेतात. तर काही रंग ते परावर्तित (Reflect) करतात. उन्हाळ्याचा त्रास कमी करण्यासाठी कपड्यांच्या रंगांची निवड कशी असावी, याबद्दल आज आपण सविस्तर जाणून घेऊया.
१. पांढरा रंग
उन्हाळ्यात पांढरा रंग हा सर्वात थंड मानला जातो. पांढरा रंग सूर्यप्रकाश आणि उष्णता शोषून घेण्याऐवजी ती परावर्तित करतो. यामुळे शरीराचे तापमान नियंत्रित राहण्यास मदत होते. तसेच जास्त घाम येत नाही.
२. फिकट गुलाबी आणि बेबी पिंक
गडद रंगांच्या तुलनेत फिकट गुलाबी रंग डोळ्यांना तर शांतता देतो. त्यासोबतच शरीरालाही गारवा देतो. हा रंग उष्णता कमी शोषून घेत असल्याने उन्हाळ्यात बाहेर पडताना हा एक उत्तम पर्याय ठरू शकतो.
३. आकाशी किंवा फिकट निळा
निळा रंग हा निसर्गतः शीतलतेचे प्रतीक मानला जातो. उन्हाळ्यात गडद निळ्या ऐवजी ‘स्काय ब्लू’ किंवा ‘पावडर ब्लू’ रंगाचे सुती कपडे घातल्यास उन्हाचा चटका कमी जाणवतो.
४. पिवळा आणि लिंबू पिवळा
पिवळा हा ऊर्जेचा रंग असला तरी, उन्हाळ्यात त्याचे फिकट शेड्स अत्यंत प्रभावी ठरतात. लिंबू पिवळा रंग प्रकाशाला परावर्तित करतो, ज्यामुळे शरीराला उष्णतेपासून संरक्षण मिळते.
५. मिंट ग्रीन किंवा फिकट हिरवा
निसर्गाच्या जवळ जाणारा हा रंग उन्हाळ्यात मनाला आणि शरीराला प्रसन्न ठेवतो. मिंट ग्रीन रंगाचे कपडे घातल्याने उष्णतेचा दाह कमी जाणवतो.
कोणती काळजी घ्यावी?
उन्हाळ्यात काळा, गडद निळा किंवा गडद जांभळा रंग टाळावा. हे रंग उष्णता शोषून घेतात, ज्यामुळे अधिक घाम येतो आणि अस्वस्थता वाढते. केवळ रंगच नाही, तर कापडही महत्त्वाचे आहे. उन्हाळ्यात सुती (Cotton) किंवा लिनेन (Linen) कापडाचेच कपडे वापरावेत, कारण ते घाम शोषून घेतात आणि त्वचेला हवा खेळती ठेवतात. उन्हाळ्यात घट्ट कपड्यांऐवजी थोडे सैल कपडे घालण्याला प्राधान्य द्यावे.
दरम्यान उन्हाळ्यात केवळ फॅशन म्हणून नव्हे, तर विज्ञानाचा विचार करून निवडलेले हलके रंग आणि सुती कापड आपल्याला उन्हाच्या तीव्रतेपासून वाचवू शकतात. बाहेरील उष्णतेचा सामना करण्यासाठी शरीराला आतून हायड्रेटेड ठेवण्यासोबतच योग्य कपड्यांची निवड केल्यास, उन्हाळा अगदी सुखद होऊ शकतो. त्यामुळे यंदाच्या उन्हाळ्यात स्वतःला फिट आणि कूल ठेवण्यासाठी आपल्या वॉर्डरोबमध्ये या समर फ्रेंडली रंगांचा समावेश नक्की करावा.
