जोडीदारासोबत एकत्र व्यायाम केल्याने काय होते? कारण ऐकून तुम्ही देखील व्हाल थक्क

दिवसभराच्या धावपळीनंतर संध्याकाळी चहा घेत मोबाईल स्क्रोल करण्याऐवजी आपल्या पार्टनरसोबत वॉकिंग, रनिंग किंवा व्यायाम करण्याचा पर्याय निवडून पाहा. कारण फिटनेस हा केवळ शरीर निरोगी ठेवण्यासाठी किंवा वजन कमी करण्यासाठीच उपयोगी नसून, नात्यातील प्रेम, विश्वास आणि समजूतदारपणा वाढवण्यासाठीही मदत करू शकतो. एकत्र व्यायाम करणाऱ्या जोडप्यांना एकमेकांसोबत वेळ घालवण्याची आणि समान उद्दिष्टांसाठी प्रयत्न करण्याची संधी मिळते.

मूड सुधारतो, नात्यात समाधान वाढते

व्यायाम केल्यामुळे शरीरात एंडॉर्फिनसारख्या रसायनांची निर्मिती होते, ज्यामुळे मूड सुधारण्यास मदत होते. पार्टनरसोबत व्यायाम केल्याने दिवसभराचा ताण कमी करण्यास, एकमेकांशी आनंदाने संवाद साधण्यास आणि नात्यात सकारात्मकता वाढवण्यास मदत होऊ शकते.

2021 मधील एका अभ्यासात 95 जोडप्यांच्या 14 दिवसांतील नोंदींचा अभ्यास करण्यात आला. त्यामध्ये ज्या दिवशी पार्टनर एकत्र व्यायाम करत होते, त्या दिवशी त्यांचा मूड आणि नात्यातील समाधान अधिक असल्याचे आढळले.

एकमेकांवरील विश्वास वाढतो

रनिंग करताना पार्टनरला प्रोत्साहन देणे, जिममध्ये व्यायाम करताना एकमेकांना मदत करणे किंवा एखादे फिटनेसचे लक्ष्य पूर्ण करण्यासाठी सोबत प्रयत्न करणे, यामुळे परस्परांतील सहकार्याची भावना वाढते. कठीण प्रसंगीही आपण एकमेकांच्या पाठीशी आहोत, ही भावना नात्याला अधिक मजबूत बनवू शकते.

मोबाईलपासून दूर मिळतो एकमेकांसाठी वेळ

आज अनेक जोडपी एकत्र बसलेली असतात; मात्र दोघांचेही लक्ष मोबाईलमध्ये असते. एकत्र वॉकिंग, सायकलिंग किंवा जिम केल्याने काही वेळ फोनपासून दूर राहता येते. या वेळेत मनमोकळ्या गप्पा मारता येतात, दिवसभरातील अनुभव शेअर करता येतात आणि एकमेकांना अधिक चांगल्या प्रकारे समजून घेता येते.

समान उद्दिष्टांमुळे नाते होते मजबूत

वजन नियंत्रणात ठेवणे, नियमित व्यायाम करणे, संतुलित आहार घेणे किंवा दररोज ठरावीक अंतर चालणे अशी उद्दिष्टे दोघे मिळून ठरवू शकतात. एखाद्या दिवशी व्यायाम करण्याचा कंटाळा आल्यास पार्टनर प्रेरणा देऊ शकतो. एकत्र मिळवलेले छोटे-मोठे यश साजरे केल्याने नात्यात उत्साह टिकून राहतो.

कपल वर्कआउटची सुरुवात कशी कराल?

दररोज 20 ते 30 मिनिटे एकत्र चालण्यापासून सुरुवात करा. आठवड्यातून काही दिवस सायकलिंग, योग किंवा हलका व्यायाम करा. एकमेकांवर दबाव न टाकता समान फिटनेसचे लक्ष्य ठरवा. व्यायामाच्या वेळी मोबाईल बाजूला ठेवा आणि एकमेकांना प्रोत्साहन द्या. दोघांची शारीरिक क्षमता आणि आवड लक्षात घेऊन व्यायाम निवडा.