आता बाजारात आला Ai टुथब्रश, कॅमेऱ्याच्या मदतीने घासून देणार दात; भन्नाट फीचर्स वाचून चकित व्हाल!

Dyson Ai Brush : मानवी शरीरातील प्रत्येक अवयव महत्त्वाचा असतो. आपल्या प्रत्येक अवयवांची काळजी घेणे गरजेचे आहे. आपण थोडेजरी दुर्लक्ष केले तर त्याचे फळ आपल्याला भोगावे लागू शकते. मुखाच्या म्हणजेच तोंडाच्या आरोग्याकडे बहुसंख्य लोक दुर्लक्ष करतात. विशेष म्हणजे तोंडात असणाऱ्या दातांची निगा राखण्याची तर लोक खूपच टाळाटाळ करतात. यामुळे भविष्यात दात लवकर पडण्याची, त्रास होण्याची शक्यता असते. अशा प्रकारच्या गंभीर समस्या निर्माण होऊ नयेत म्हणून दररोज दात स्वच्छ घासावेत असे डेन्टिस्ट सांगतात. परंतु काही लोक थातूर-मातूर दात घासून पुढच्या कामाला लागतात. अनेक लोकांना दात घासण्याचा कंटाळा असतो. त्यामुळेच आता आधुनिक तंत्रज्ञानाची मदत घेऊन वेगवेगळ्या प्रकारच्या ब्रशचा अविष्कार करण्यात आलेला आहे. सध्या मात्र बाजारात थेट एआय ब्रश आला आहे.

डायसन या कंपनीने हा ब्रश तयार केला

हा ब्रश एआयच्या मदतीने तुमचे दाथ घासून देईल. या ब्रशमध्ये 1 लाख पिक्सेल कॅमेरा बसवण्यात आलेला आहे. कॅमेऱ्याच्या मदतीने हा ब्रश तुमच्या दातांचे निरीक्षण करेल. कुठे अन्नाचा तुकडा फसलेला आहे, हे शोधून हा ब्रश तो भाग स्वच्छ करून देईल. डायसन या कंपनीने हा ब्रश तयार केला आहे. डायसन ही कंपनी व्हॅक्यूम क्लिनर, हेअर ड्रायर, प्रीमियम हेडफोन तयार करते. आता याच कंपनीने एआय ब्रशची निर्मिती केली असून या ब्रशला डायसन कॅमरा-जेट (Dyson CameraJet) असे नाव देण्यात आलेले आहे.

ब्रशची विशेषता काय आहे?

हा ब्रश साधारण इलेक्ट्रिक ब्रश नाही. तो एआयच्या मदतीने काम करेल. ब्रश करणे, फ्लॅसिंग करणे, माऊथवॉश करणे अशा प्रकारची कामे तो करेल. या ब्रशमध्ये एक लाख पिक्सेलचा मायक्रोलेन्स कॅमेरा बसवण्यात आलेला आहे. साधारण 4 लाख 70 हजार वेगवेगळ्या इमेसजच्या माध्यमातून या ब्रशच्या एआय मॉडेलला प्रशिक्षण देण्यात आलेले आहे. या ब्रशच्या वर 12.5 मीलीलिटरचा एक टँक असेल. यात माऊथवॉश टाकता येईल. मुखामध्ये वरच्या तसेच खालच्या अशा दोन्ही बाजूंनी या ब्रशच्या मदतीने दातांची सफाई करता येईल. दरम्यान, या ब्रशची सगळीकडे चर्चा होत असून त्याची नेमकी किंमत अद्याप समोर आलेली नाही.