Padwa Recipe: दिवाळी पाडव्याला नवऱ्याला द्या गोड सरप्राइज! घरच्या घरी बनवा स्वादिष्ट केशर-बदाम खीर, सोपी आहे रेसिपी
Diwali Padwa Sweet Recipe: दिवाळी पाडव्याला नवऱ्यासाठी काहीतरी खास पदार्थ बनवायचा विचार करत असाल ही केसर बदामची खीर बनवू शकता. ही रेसिपी बनवायला खूप सोपी आहे.
दिवाळीतील पाडवा हा नवरा-बायकोच्या नात्यातील प्रेम, विश्वास आणि जिव्हाळा अधिक घट्ट करणारा खास सण आहे. या दिवशी पत्नी आपल्या पतीला ओवाळून त्याच्या दीर्घायुष्यासाठी प्रार्थना करते. तर पतीही पत्नीला भेटवस्तू देऊन तिच्याप्रती प्रेम व्यक्त करतो. त्यामुळे हा दिवस आणखी खास बनवण्यासाठी एकमेकांसाठी काहीतरी गोड आणि आवडीचे बनवण्याची संधी असते. तुम्हीही यंदाच्या पाडव्याला नवऱ्यासाठी काहीतरी खास गोडधोड बनवण्याचा विचार करत असाल, तर केशर-बदाम खीर हा उत्तम पर्याय ठरू शकतो. केशरचा सुगंध, बदामाचा कुरकुरीतपणा आणि दुधाचा छान गोडवा यामुळे ही खीर अगदी शाही लागते. विशेष म्हणजे, ही खीर बनवण्यासाठी जास्त मेहनतही घ्यावी लागत नाही. चला तर मग, जाणून घेऊया केशर-बदाम खीर बनवण्याची सोपी रेसिपी
केसर बदाम खीर बनवण्यासाठी तुम्हाला आवश्यक आहे…
– दूध – तांदूळ – साखर – केशर – बदाम – वेलची पावडर
केसर बदाम खीर बनवण्याची पद्धत
ही खीर बनवण्यासाठी प्रथम तांदूळ भिजवून घ्या. तांदूळ किमान १ तास भिजत ठेवा. असे केल्याने खीर लवकर तयार होते. आता एका भांड्यात दूध गरम करा. हे दुध मंद आचेवर उकळू द्या. आता एका वाटीत थोडे कोमट दूध घेऊन त्यात केशर कुस्करून घ्या. दुधाला उकळी आल्यावर त्यात केशर घाला. काही वेळाने दुधात केशरचा छान रंग आल्यावर त्यात भिजवलेले तांदूळ घाला. हे आता चांगले शिजू द्या. एकीकडे खीर बनवत असताना दुसरीकडे बदाम भाजून घ्या. काही बदाम बारीक वाटून घ्या. बाकीचे बदाम बारीक चिरून घ्या. खीर शिजल्यावर त्यात साखर घाला. असे केल्यावर खीरमध्ये थोडे पाणी दिसू लागेल. अशा परिस्थितीत ते पुन्हा चांगले उकळा. घट्ट झाल्यावर त्यात बदामाची पूड घालून मिक्स करा. तयार झाल्यावर गॅस बंद करून खीरला बारीक चिरलेल्या बदामांनी सजवा. तुमची टेस्टी केसर बदाम खीर तयार आहे.
लक्षात ठेवा या टिप्स
• केशर आधी कोमट दुधात भिजवून ठेवा. यामुळे खिरीला छान रंग आणि सुगंध येतो. • खीर घट्ट आणि मलईदार होण्यासाठी फुल क्रीम दुधाचा वापर करा. • दूध भांड्याला लागू नये म्हणून खीर अधूनमधून ढवळत राहा. • खीर शिजताना शेवटी वेलची पूड घालू शकता. यामुळे स्वाद वाढतो. • सर्व्ह करताना बदाम, पिस्ता आणि केशराच्या काड्यांनी गार्निश करा. • खीर गरम किंवा थंड दोन्ही प्रकारे सर्व्ह करू शकता. थंड खीर हवी असल्यास फ्रिजमध्ये ठेवा.
