Kitchen Tips : कितीही छान पीठ मळलं तरी पुरी फुगत नाही? त्यासाठी या सोप्या 5 टिप्स करा फॉलो

पुरी तेलात पडली की फुगण्याऐवजी चपटीच राहिली तर सगळा मूडच खराब होतो! कितीही छान पीठ मळलं तरी पुरी फुगत नसेल तर नेमकी चुक कुठे होते ? पुरी फुगून मस्त गोल आणि खुसखुशीत होण्यासाठी पीठ मळतानाच काही गोष्टी लक्षात ठेवणे महत्त्वाचे आहे.

पुरीचं पीठ पातळ होऊ देऊ नका

पुरीसाठी मळलेलं पीठ पोळीच्या पीठापेक्षा थोड घट्ट असावं. पीठ मळताना एकदम जास्त पाणी घालू नका. गरजेनुसार थोडं थोडं पाणी घालून पीठ मळा. पीठ व्यवस्थित एकजीव झाल्यानंतर त्यात एक चमचा तेल घालून पुन्हा एक- दोन मिनिटे मळा.यामुळे पीठ मऊसर आणि गुळगुळीत होईल.

पीठ जास्त वेळ झाकून ठेवू नका

पुरीच्या पीठाला जास्त वेळ झाकून ठेवण्याची गरज नसते.पीठ मळल्यानंतर साधारण ५ ते १० मिनिटे ते झाकून ठेवलं तरी पुरेसं आहे. खूप वेळ पीठ तसंच ठेवल्यास पुरीच्या पीठावर परिणाम होतो.

कुरकुरीत पुरीसाठी रवा वापरा

पुरी थोडी जास्त कुरकुरीत हवी असेल तर पीठात थोडावा रवा मिसळू शकता. यामुळे पुरीला कुरकुरीतपणा येतो आणि टम्म फुगतेही.

पुरी लाटताना ही चूक टाळा

पुरी खूप पातळ किंवा खूप जाड लाटू नये. योग्य जाडी ठेवणं महत्त्वाचं आहे. पुरी लाटताना पोळीप्रमाणे कोरडं पीठ लावणं टाळा . कोरड्या पिठाचे कण तेलात पडल्याने तेल खराब होते. त्यामुळे पुरी नीट फुगत नाही. त्यामुळे पुरीला पीठ लावण्याऐवजी नेहमी थोड्याप्रमाणात तेल लावून लाटावे.

तेलं पुरेसं गरम असणे गरजेचे

पुरी फुगण्यासाठी तेलाचं तापमान योग्य असणं खूप महत्त्वाचे आहे. तेल कमी गरम असेल तर पुरी जास्त तेल शोषू शकते. तेल खूप गरम असेल तर पुरी बाहेरून पटकन लाल होऊ शकते आणि आतून नीट शिजणार नाही. तेल तपासण्यासाठी पीठाचा छोटा तुकडा तेलात टाकून पाहा. तो लगेच वर आला आणि तेलात तरंगू लागला तर समजून जा तेल पुर्णपणे गरम झालेले आहे.

पुरी तेलाच टाकल्यानंतर हलकं दाबा

लाटलेली पुरी काळजीपूर्वक तेलात सोडा. पुरी तळायला सुरूवात झाल्यावर झाऱ्याने हलकं तेल तिच्यावर टाकत किंवा पुरीला हलकं दाबत राहिल्यास ती फुगण्यास मदत होते. पुरी फुगल्यानंतर ती पलटून दुसरी बाजूही तळा. पुरी साधारण सोनेरी रंगाची झाली की बाहेर काढा.