उन्हाळ्यात शरीराला आतून थंड ठेवण्यासाठी नैसर्गिक घटकांपासून बनवा ‘हे’ पारंपरिक सरबत, जाणून घ्या रेसिपी

उन्हाळ्याच्सा दिवसात उष्मघातापासून बचाव व्हावा यासाठी शरीराला हायड्रेटेड आणि आतून थंड ठेवण्याची गरज असते. त्यामुळे केवळ साधे पाणी पिण्याऐवजी आपल्या दैनंदिन दिनचर्येत आरोग्यदायी पेयांचा समावेश केला पाहिजे. भारतीय घरांमध्ये उन्हाळ्यात विविध नैसर्गिक घटकांपासून सरबत तयार केले जाते. जे शरीरातील इलेक्ट्रोलाइट्सची भरपाई करून त्वरित ऊर्जा तर देतेच, शिवाय विविध पोषक तत्वेही पुरवते. ही सरबतं तुमचे पोट थंड ठेवतात आणि उष्माघातापासून संरक्षण करण्यापासून ते पचनक्रिया सुधारण्यापर्यंत अनेक फायदे देतात.

वेगवेगळ्या प्रकारच्या सरबतांचे अनेक आरोग्यदायी फायदे आहेत, त्यामुळे उष्णतेपासून बचाव करण्यासाठी फ्रिजमधून थेट पाणी पिण्याऐवजी तुम्ही हे सरबत पिऊ शकता. या लेखात उन्हाळ्यातही थंड आणि निरोगी राहण्यासाठी काही नैसर्गिक घटकांपासून बनवलेल्या सरबताची झटपट रेसिपी जाणून घेऊयात.

बेलाच्या फळाचे सरबत

उन्हाळ्यात बेलफळाच्या गरापासून तयार सरबत पिणे उत्तम असते, कारण त्यामुळे शरीराला थंडावा तर मिळतोच, शिवाय उष्माघातापासूनही बचाव होतो. हे सरबत पचनासाठीही फायदेशीर असून त्वचेच्या आरोग्यासाठीही उपयुक्त आहे. पिकलेल्या बेलफळाचा गर काढून तो चांगला बारीक करून घ्या. त्यातील सर्व तंतुमय भाग काढून टाका. नंतर एका ग्लासात पाणी आणि बर्फाचे काही तुकडे मिक्स करा. आवश्यकतेनुसार बेलफळाचा गर त्यात टाका आणि त्यात गूळ किंवा साखर तसेच काळे मीठ, काळी मिरी आणि भाजलेल्या जिऱ्याची पूड टाकून मिक्स करा. अशाप्रकारे बेलाचे सरबत पिण्यास तयार आहे.

सत्तू सरबत

उन्हाळ्यात सत्तू शरबत सुद्धा उत्तम लागते. यासाठी, एका ग्लासात सत्तू घ्या, त्यात बर्फाचे तुकडे आणि पाणी टाकून चांगले ढवळा. त्यात बारीक चिरलेला कांदा आणि बारीक चिरलेली हिरवी मिरची घाला, आणि लिंबाचा रस टाका. भाजलेल्या जिऱ्याची पूड आणि काळे मीठ यांसारखे नेहमीचे मसाले टाकून सरबत तयार करा. तुमचे चविष्ट आणि प्रथिनयुक्त सरबत तयार आहे.

गुलाब सिरपचा सरबत

उन्हाळ्यात गुलाबाचा सरबत शरीराला थंड करण्यास त्वरित आराम देतो. यासाठी, तुम्ही बाजारातून गुलाब सिरप विकत घेऊ शकता किंवा घरात गुलाबाच्या पाकळ्या स्वच्छ करून पाण्यात उकळू शकता. त्यानंतर त्यात साखर आणि लिंबाचा रस टाकून त्यांचा सिरप तयार करू शकता. त्यात रोज इसेंस टाकू शकता. आता तयार मिश्रण एका काचेच्या बरणीत ठेऊ शकता आणि गरज असेल तेव्हा लगेच हे सिरप पाण्यात मिक्स करून प्या.

बडीशेप सरबत

सर्वप्रथम बडीशेप पाण्यात भिजवून रात्रभर भिजत ठेवा. दुसऱ्या दिवशी ती मिक्सरमध्ये बारीक वाटून घ्या. त्यानंतर त्यात खडीसाखर वापरून सिरप तयार करा. मग तुम्ही दूध किंवा पाणी वापरून या सिरप पासून सरबत बनवू शकता.

( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)