Fresh Fruits: फळे खरेदी करण्यापूर्वी ‘या’ गोष्टी तपासा, कसे ओळखाल चांगले आहे की खराब?

Fresh Fruits: फळे आरोग्यासाठी फार महत्त्वाचे आहेत. पण आपण खात असलेली फळे चांगली आहेत की नाही, हे लक्षात घेणं देखील फार महत्त्वाचं आहे. सांगायचं झालं तर, बाजारात फळं खरेदी करताना, बरेच लोक त्यांचा रंग किंवा आकार पाहून ती खरेदी करायची की नाही हे ठरवतात. केवळ फळ दिसायला चांगले आहे म्हणून ते ताजे किंवा खाण्यायोग्य असेलच असं कधीच नसतं. कधीकधी, बाहेरून चांगली दिसणारी फळे आतून सडलेली असू शकतात. काही फळे पिकल्यावर मऊ होतात, त्यामुळे, फळे खरेदी करताना अनेक गोष्टी लक्षात ठेवणं आवश्यक आहे.

बाजारातून फळे विकत घेताना सर्वप्रथम, फळाची साल नीट निरखून पाहा. त्यावर काळे किंवा तपकिरी डाग, भेगा, सडलेले भाग किंवा मऊ भाग आहेत का ते तपासा. एखादा लहान डाग असला म्हणजे फळ खराब आहे असे नाही. पण, जर डाग लवकर पसरत असतील किंवा तो भाग नेहमीपेक्षा जास्त मऊ लागत असेल, तर ते फळ खाणं टाळावं.

ताज्या फळांना सहसा एक नैसर्गिक आणि परिचित वास असतो. जर तुम्हाला सडलेला, आंबट किंवा विचित्र वास येत असेल तर सावध व्हा. वास हा फळ खराब होण्याचा एक महत्त्वाचा निर्देशक असू शकतो. त्यामुळे फळांचा वास कसा आहे ते पाहा.

सर्वात महत्त्वाचं म्हणजे, फळाच्या प्रकारानुसार त्याचा सामान्य टणकपणा तपासा. जे फळ जास्तच मऊ, लगदा झालेले असते किंवा दाबल्यावर तुटते, ते अनेकदा खराब झाल्याचं लक्षण असतं. पण हाच नियम सर्व फळांना लागू होत नाही. उदाहरणार्थ, पिकलेली केळी आणि आंबे नैसर्गिकरित्या थोडे मऊ असतात.

फळे खरेदी करताना महत्त्वाची गोष्ट लक्षात ठेवा, फळे खरेदी करताना केवळ फळ विक्रेत्याचे ऐकून न घेता, ती स्वतः तपासणं महत्त्वाचं आहे. फळ घेताना तुम्ही फळाचं स्वरूप, वास आणि प्रकार या सर्व घटकांचा विचार केला पाहिजे.