कडक उन्हामुळे स्किन टॅन झाली? घरच्या घरी तयार करा फेस पॅक, त्वचा दिसेल तजेलदार

चेहऱ्याची त्वचा निरोगी, नितळ आणि तजेलदार दिसावी, अशी प्रत्येकाची इच्छा असते. मात्र, ऑक्टोबर महिन्यातील कडक उन्हाचा परिणाम त्वचेवर होऊन चेहरा टॅन होणे, त्वचा निस्तेज दिसणे आणि कोरडेपणा जाणवणे अशा समस्या उद्भवू शकतात. अशा वेळी त्वचेची काळजी घेण्यासाठी अनेक महिला महागड्या स्किन केअर प्रॉडक्ट्सचा वापर करतात. तसेच अनेक महिला महागड्या ब्युटी ट्रीटमेंट देखील करतात. पण प्रत्येक वेळी जास्त पैसे खर्च करण्याची गरज नसते. घरात सहज उपलब्ध असलेल्या काही घटकांच्या मदतीनेही त्वचेची निगा राखता येऊ शकते. कोरफड, मध आणि हळद यांसारखे घटक त्वचेला ओलावा देण्यास मदत करू शकतात. टॅन झालेल्या त्वचेची काळजी घेण्यासाठी या घटकांपासून फेस पॅक कसा तयार करायचा आणि तो वापरताना कोणती काळजी घ्यायची, जाणून घ्या.

कोरफड, मध आणि हळदीचा फेस पॅक

टॅन झालेल्या त्वचेची काळजी घेण्यासाठी कोरफड, मध आणि हळद यांचा फेस पॅक वापरता येतो. हा फेस पॅक तयार करण्यासाठी दोन चमचे एलोवेरा जेल, एक चमचा मध आणि चिमूटभर हळद घ्या. हे तिन्ही घटक एका स्वच्छ भांड्यात एकत्र करून त्याची गुळगुळीत पेस्ट तयार करा. कोरफड त्वचेला ओलावा देण्यास मदत करते, तर मध त्वचेतील आर्द्रता टिकवून ठेवण्यास उपयुक्त ठरू शकतो. हळदीमध्ये अँटिऑक्सिडंट गुणधर्म असतात.

फेस पॅक लावण्याची योग्य पद्धत

हा फेस पॅक लावण्यापूर्वी चेहरा स्वच्छ पाण्याने किंवा सौम्य फेस वॉशने धुऊन घ्या. त्यानंतर तयार केलेली पेस्ट चेहरा आणि मानेवर हलक्या हाताने लावा. साधारण १० मिनिटे फेस पॅक चेहऱ्यावर राहून द्या. नंतर थंड किंवा साध्या पाण्याने चेहरा स्वच्छ धुवा. चेहरा धुतल्यानंतर त्वचेला अनुरूप मॉइश्चरायझर लावा. चेहऱ्यावर जोरात मसाज करू नका. तुमची त्वचा सेंसेटिव्ह असल्यास हा फेस पॅक वापरण्यापूर्वी एकदा पॅच टेस्ट नक्की करा. खाज, जळजळ किंवा लालसरपणा जाणवल्यास वापरू नका.

त्वचेची काळजी घेताना या गोष्टी लक्षात ठेवा

फेस पॅकचा वापर करताना हळदीचे प्रमाण जास्त ठेवू नका. फेस पॅक लावण्यापूर्वी चेहरा स्वच्छ असल्याची खात्री करा. तसेच फेस पॅक धुतल्यानंतर मॉइश्चरायझर लावायला विसरू नका. उन्हामुळे त्वचा भाजली असेल किंवा जळजळ होत असेल, तर घरगुती उपाय करणे टाळा. बाहेर जाताना किमान एसपीएफ ३० असलेले सनस्क्रीन वापरा आणि गरजेनुसार पुन्हा लावा.