Yoga Tips: सतत पाठ अन् कंबर दुखतेय? हे एक योगासन देईल आराम
Yoga for Lower Back Pain: सतत बसून काम करणे, चुकीची बसण्याची पद्धत आणि शारीरिक हालचालींचा अभाव यामुळे अनेकांना पाठदुखी, कंबरदुखीचा त्रास जाणवतो. अशा वेळी हे एक सोपे योगासन उपयुक्त ठरू शकते. जाणून घ्या हे योगासन कोणते आहे आणि ते कसे करावे.
आजकाल अनेकांना कंबरदुखीचा त्रास जाणवतो. विशेषतः तासनतास एकाच जागी बसून काम करणे, चुकीच्या पद्धतीने बसणे किंवा बराच वेळ उभे राहणे यामुळे पाठीच्या कण्यावर ताण येऊ शकतो. अशा वेळी शरीराचा लवचिकपणा टिकवून ठेवण्यासाठी योगासने फायदेशीर ठरू शकतात. यापैकीच एक महत्त्वाचे आसन म्हणजे अर्ध मत्स्येंद्रासन. सिटेड ट्विस्ट हे आसन पाठीचा कणा लवचिक ठेवण्यास आणि कंबरदुखीचा त्रास कमी करण्यास मदत करू शकते. चला तर मग, हे आसन करण्याची योग्य पद्धत आणि त्याचे फायदे जाणून घेऊया.
अर्ध मत्स्येंद्रासन करण्याचे फायदे
१. कंबरदुखी – या आसनामुळे पाठीच्या स्नायूंना ताण मिळतो. त्यामुळे पाठदुखीचा त्रास कमी होण्यास आणि पाठीचा कणा लवचिक ठेवण्यास मदत होऊ शकते.
२.पचनशक्ती – अर्ध मत्स्येंद्रासनामुळे पोटाच्या भागाला हलका व्यायाम मिळतो. त्यामुळे पचनक्रिया सुधारण्यास मदत होऊ शकते.
३. मासिक पाळी – मासिक पाळीदरम्यान होणाऱ्या वेदना आणि पोटातील गोळे येण्याचा त्रास कमी करण्यासाठी हे आसन उपयुक्त ठरू शकते.
४. तणाव – या आसनाच्या नियमित सरावामुळे शरीराला आराम मिळण्यास आणि मानसिक तणाव कमी करण्यास मदत होऊ शकते.
अर्ध मत्स्येंद्रासन करण्याची योग्य पद्धत
सुरुवात – सर्वप्रथम योगा मॅटवर बसा आणि दोन्ही पाय समोरच्या दिशेने सरळ पसरवा. पाठीचा कणा ताठ ठेवा.
पायांची स्थिती – आता दोन्ही गुडघे वाकवा. डावा पाय उजव्या पायाखालून सरकवून उजव्या नितंबाच्या बाहेरील बाजूला ठेवा. डावा गुडघा वरच्या दिशेने राहील याची काळजी घ्या.
शरीर वळवा – हळूहळू श्वास घ्या आणि शरीराचा वरील भाग उजव्या बाजूला वळवा. उजवा हात शरीराच्या मागे जमिनीवर ठेवा आणि डावा हात उजव्या गुडघ्याच्या बाहेरील बाजूला ठेवा.
पाठीचा कणा ताठ ठेवा – पाठीचा कणा शक्य तितका सरळ ठेवा. आता मान हळूहळू उजव्या बाजूला वळवा आणि उजव्या खांद्याच्या दिशेने पाहण्याचा प्रयत्न करा.
आसनात स्थिर राहा – श्वास सोडताना शरीर थोडे अधिक वळवण्याचा प्रयत्न करा. मात्र, शरीरावर जास्त ताण देऊ नका.
दुसऱ्या बाजूने करा – या स्थितीत ३० सेकंद ते १ मिनिट राहा. त्यानंतर हळूहळू मूळ स्थितीत या. काही वेळ विश्रांती घेऊन दुसऱ्या बाजूनेही हीच कृती करा.
आसन करताना कोणती काळजी घ्यावी?
• आसन करताना पाठीचा कणा शक्य तितका सरळ ठेवा.
• शरीराला क्षमतेपेक्षा जास्त वळवण्याचा प्रयत्न करू नका.
• आसन करताना वेदना किंवा अस्वस्थता जाणवल्यास सराव थांबवा.
