पुण्यात सुरु तरी काय? 4 वर्षांच्या चिमुरडीनंतर, 11 वर्षीय मुलीचा वियनभंग, ‘त्या’ काही मिनिटांत नेमकं काय घडलं? पोलिसांची मोठी कारवाई

पुणे जिल्ह्यातील भोर तालुक्यामधील नरसापूर येथील 4 वर्षांच्या चिमुरडीवर अत्याचार आणि तिची निर्घृण हत्या केल्याने राज्यात खळबळ उडाली आहे. याप्रकरणी पोलिसांनी 65 वर्षीय विकृताला अटक केली आहे. ही घटना ताजी असताना पुण्यात आणखी एक संतापजनक घटना घडली आहे. 11 वर्षीय मुलीचा विनयभंग केल्याची माहिती समोर येत आहे. या प्रकरणी मोठी कारवाई करत पोलिसांनी परप्रांतीय नराधमाला अटक केली आहे. सांगायचं झालं तर, पुणे जिल्ह्यात अत्याचार आणि खुनाच्या सलग दोन घटनांमुळे नागरिकांमध्ये भितीचे वातावरण असतानाच, पुन्हा एकदा अल्पवयीन मुलीवर विनयभंग झाल्याने परप्रांतीयांविरुद्ध संतापाची लाट उसळली आहे.

मिळालेल्या माहितीनुसार, पुणे जिल्ह्यातील चाकण जवळील बिरदवडी येथे अकरा वर्षीय अल्पवयीन मुलीचा विनयभंग झाल्याची संतापजनक घटना समोर आली आहे. उत्तर चाकण पोलिसांनी परप्रांतीय 32 वर्षीय आरोपी अरुण गयाप्रसाद मिश्रा याला ताब्यात घेतले आहे.

‘त्या’ काही मिनिटांत नेमकं घडलं तरी काय?

शनिवारी दुपारी 3 वाजेच्या सुमारास पीडिता घरात कोणी नसल्याने घराला कुलूप लावून आपल्या काकाच्या घरी जात होती. मुलगी एकटी असल्याचं पाहून आरोपीने घराच्या कंपाऊंडमध्ये प्रवेश करत तिच्यावर अत्याचार करण्याचा प्रयत्न केला, मात्र 11 वर्षीय पीडित मुलीने तेथून पळ काढला, ज्यामुळे ती बचावली.

त्यानंतर घडलेली सर्व घटना 11 वर्षीय मुलीने तिच्या वडिलांना सांगितली. त्यानंतर वडिलांनी पोलीस ठाण्यात धाव घेतली. अशात घटनेचं गांभीर्य लक्षात घेत पोलिसांनी देखील कठोर कारवाई केली आणि नराधम आरोपीच्या मुसक्या आवळल्या. आरोपी विरुद्ध पोक्सोच्या अंतर्गत उत्तर चाकण पोलीस ठाण्यात गुन्हा दाखल करून आरोपीला अटक करण्यात आली आहे.

पुण्यात चार वर्षीय मुलीवर अत्याचार आणि हत्या

65 वर्षांच्या आरोपीने चार वर्षांच्या चिमुरडीला जनावरांच्या गोठ्यात नेऊन तिच्यावर अत्याचार केला. त्याने दगडाने ठेचून तिची हत्या केली. त्यानंतर तिचा मृतदेह तिथेच लपवण्याचा प्रयत्न केला. आरोपी या चिमुरडीला सोबत नेतानाचा सीसीटीव्ही समोर आला आहे. घटनेनंतर सर्वत्र खळबळ उडाली आहे. धक्कादायक गोष्ट म्हणजे आरोपीची ही पहिली वेळ नव्हती, यापूर्वी देखील त्याने अनेक महिलांसोबत वाईट वर्तन केलंय. पोलिसांनी आरोपीला अटक केली असून पुढील कारवाई सुरु आहे.