उद्धव ठाकरे यांना सर्वात मोठा झटका… सहा खासदारांच्या गटाला मंजूरी? लोकसभा अध्यक्षांचा निर्णय काय?

प्रमोद जगताप, प्रतिनिधी, टीव्ही ९ मराठी: उद्धव ठाकरे यांच्या शिवसेनेतील फुटीवर अखेर शिक्कामोर्तब झाले. उद्धव ठाकरे यांच्या 6 खासदारांनी स्वतंत्र गट स्थापन करण्याविषयीचा अर्ज कालच लोकसभा अध्यक्षांकडे सादर केल्याची मोठी माहिती समोर आली. तर आज लोकसभा अध्यक्ष ओम बिर्ला यांनी उद्धव सेनेच्या सहा खासदारांच्या गटाला मंजूरी (Operation Tiger Shivsena)दिल्याची माहिती समोर आली आहे. तर खासदार संजय राऊत हे तातडीने लोकसभा अध्यक्ष बिर्ला यांच्या भेटीला पोहचले आहेत. या गटाला मंजूरी देण्यापूर्वी उद्धव सेनेची बाजू ऐकून घेण्यासाठीची विनंती ते करणार असल्याचे समजते.

लोकसभा अध्यक्षांची स्वतंत्र गटाला मंजूरी

लोकसभा अध्यक्ष ओम बिर्ला यांच्याकडे उद्धव ठाकरे शिवसेनेच्या 6 खासदारांनी अगोदरच अर्ज दाखल केल्याची माहिती समोर आली आहे. स्वतंत्र गट म्हणून मान्यता मिळावी याासाठी हा अर्ज करण्यात आला होता. ओम बिर्ला तातडीने काल रात्री दाखल झाले. तर उद्धव सेनेचे खासदार अरविंद सावंत यांनी ओम बिर्ला यांना उद्धव ठाकरे शिवसेनेच्या वतीने चार पानी पत्र पाठवले होते. त्यात असा कोणताही स्वतंत्र गट स्थापन्यापूर्वी ,विलिनीकरणापूर्वी उद्धव सेनेची हरकत ग्राह्य धरण्याची विनंती करण्यात आली होती. पण बंडखोर खासदारांनी अगोदरच स्वतंत्र गटासाठी अर्ज केला होता. लोकसभा अध्यक्षांनी उद्धव सेनेच्या स्वतंत्र गटाला अगोदरच मंजूरी दिल्याने उद्धव सेनेचा उद्याच्या बैठकीसाठीचा व्हीपला किती महत्त्व उरलंय, असा सवाल केल्या जात आहे.

6 खासदारांचा शिंदे सेनेतील विलिनीकरणाचा मार्ग मोकळा

ठाकरे सेनेचे 6 खासदार फुटले आहे. सहा खासदारांनी कालच पत्र दिले आणि आज उद्धव ठाकरे यांनी व्हीप बजावला. त्यामुळे हा व्हीप लागू होत नसल्याचा दावा बंडखोरांनी केला आहे. तर आता खासदार संजय राऊत, खासदार अनिल सावंत, अनिल देसाई हे गेल्या 20 मिनिटांपासून लोकसभा अध्यक्षांच्या दालनात असल्याचे समजते. त्यांनी 6 खासदारांच्या स्वतंत्र गटाला मंजूरी देण्यास विरोध दर्शवल्याचे समजते. तर 6 खासदारांचा शिंदे सेनेतील विलिनीकरणाचा मार्ग मोकळा झाला आहे.

सहा खासदार केव्हा प्रतिक्रिया देणार

उद्धव ठाकरे यांच्या शिवसेनेचे सहा खासदार आता केव्हा माध्यमांसमोर येऊन प्रतिक्रिया देणार याची चर्चा रंगली आहे. संजय जाधव, ओमराजे निंबाळकर, भाऊसाहेब वाकचौरे, नागेश पाटील आष्टीकर, संजय देशमुख, संजय दिना पाटील हे सहा खासदार आता मुंबईत शिवसेना वर्धापण दिनाला पक्ष प्रवेश करतील अशी माहिती समोर येत आहे.