मुंबईत मोठी दुर्घटना चालता चालताच व्यक्ती मॅनहोलमध्ये पडला, मॅनहोल का उघडले जातात?

मुंबईमधून एक धक्कादायक घटना समोर आली आहे,  कुर्ला खैरानी रोडवरील मॅनहोलमध्ये एक व्यक्ती पडला आहे. या घटनेनं मोठी खळबळ उडाली आहे. घटनेची माहिती मिळताच अग्निशमन दल घटनास्थळी दाखल झाले असून, या व्यक्तीचा शोध घेतला जात आहे. परंतु अजूनही हा व्यक्ती कुठेही सापडलेला नाहीये.  मुंबईत उघड्या मॅनहोलमध्ये डॉक्टर पडल्याची सर्वात मोठी आणि धक्कादायक दुर्घटना २९ ऑगस्ट २०१७ रोजी घडली होती. मुंबईतील प्रसिद्ध गॅस्ट्रोएन्टेरोलॉजिस्ट डॉ. दीपक अमरापूरकर मुसळधार पावसात साचलेल्या पाण्यातून चालत असताना प्रभादेवी-एल्फिन्स्टन रोडजवळ एका उघड्या मॅनहोलमध्ये वाहून गेले होते, या दुर्घटनेत त्यांचा मृत्यू झाला होता. दरम्यान २०१७ नंतर आता  २०२६ मध्ये पुन्हा अशीच एक घटना घडली आहे.

ज्यामध्ये कुर्ला खैरानी रोडवरील मॅनहोलमध्ये एक व्यक्ती पडला आहे. या घटनेमुळे पुन्हा एकदा मुंबई महापालिकेच्या कारभारावर प्रश्नचिन्ह उपस्थित केलं जात आहे.  २०१७ ला अशी घटना घडली होती. मात्र या  घटनेनंतर देखील मुंबई महापालिकेला जाग कशी आली नाही?  असा प्रश्न उपस्थित केला जात आहे. अशा उघड्या असलेल्या मॅनहोलमुळे इतरही अपघाताची शक्यता वाढते, दरम्यान हे मॅनहोल का उघडले जातात? आणि मॅनहोल उघडे असेल तर काय काळजी घ्यावी?  असा प्रश्न आता उपस्थित होत आहे.

मॅन होल का उघडले जातात? 

जेव्हा मोठ्या प्रमाणात पाऊस होतो, त्यावेळी रस्ते जलमय होतात. पालिका प्रशासनाकडून पाण्याचा निचरा करण्याचं काम पंप आणि मॅनहोलच्या माध्यमातून केलं जातं. मॅनहोलमधून पाण्याचा निचरा वेगाने व्हावा सोबतच पाण्यातून आलेला कचरा अडकतो म्हणून मॅनहोलची जाळी काढली जाते. मात्र तिथे असलेल्या पालिका अधिकाऱ्यांच्या व्यतिरिक्त ही जाळी काढण्याची परवानगी कोणालाही नसते. पालिका अधिकाऱ्याच्या व्यतीरिक्त ही जाळी दुसरी कोणी काढल्यास, संबंधित व्यक्तीवर महापालिकेकडून फौजदारी गुन्हा देखील दाखल केला जाऊ शकतो.

मात्र पालिकेकडून मॅनहोल उघडलं जातं तेव्हा तिथे कर्मचारी तैनात असने सक्तीचे आहे. जेव्हा मॅनहोल उघडला जातो तेव्हा SWM विभागाचा कर्मचारी मॅनहोलजवळ असणं अनिवार्य असतं. त्या ठिकाणी मॅनहोल उघडा असल्याचा सूचना फलक देखील लावणं अनिवार्य असतं.