आदित्य ठाकरे यांचा दोन दिवस कोकण दौरा, खळा बैठकीतून जनतेशी साधणार संवाद
शिवसेना नेते, युवासेना प्रमुख, आमदार आदित्य ठाकरे यांचा गुरुवारपासून दोन दिवसांचा कोकण दौरा सुरू होणार आहे. तेथे ते कोकणवासीयांशी खळ्यामध्ये बसून संवाद साधणार आहेत.
कणकवली | 22 नोव्हेंबर 2023 : शिवसेना नेते, युवासेना प्रमुख, आमदार आदित्य ठाकरे यांचा गुरुवारपासून दोन दिवसांचा कोकण दौरा सुरू होणार आहे. तेथे ते कोकणवासीयांशी खळ्यामध्ये बसून संवाद साधणार आहेत. जिल्ह्यात पक्ष वाढीसंदर्भात खळा बैठकीच्या माध्यमातून ते पदाधिकारी, कार्यकर्ते तसेच कोकणातील जनतेशी संवाद साधतील अशी माहिती मिळत आहे.
आदित्य ठाकरेंच्या या झंजावाती दौऱ्यामुळे शिवसैनिकांमध्ये चैतन्य निर्माण झालं आहे. दोडामार्ग ते नागोठणे दरम्यान हा दौरा होणार असून त्यादरम्यान खळा बैठकांचही आयोजन करण्यात आलं आहे. कोकणातील घराचं वैभव म्हणजे खळं. त्याच खळ्यात बसून आदित्य ठाकरे हे लोकांशी संवाद साधतील, त्यांचे प्रश्न जाणून घेतील.
यासदंर्भात एक प्रसिद्धी पत्रकही जारी करण्यात आले आहे. गुरुवार, 23 नोव्हेंबर आणि शुक्रवार, 24 नोव्हेंबर असे दोन दिवस ते कोकण दौऱ्यावर आहेत. त्यावेळी ते कोकणातील खळा बैठकांना उपस्थित राहणार आहेत. त्या बैठकांमध्ये ते कार्यकर्ते, पदाधिकारी आणि ग्रामस्थांशी संवाद साधतील.
त्यांचा दौरा पुढीलप्रमाणे :
गुरुवार, 23 नोव्हेंबर रोजी सकाळी 11 वाजता दोडामार्ग येथे लीना कुबल यांच्या घरी बैठक होईल. तर दुपारी 12.25 वाजता सावंतवाडी येथे चंद्रकांत कासार यांच्या घरी आणि दुपारी दीड वाजता कुडाळ येथे मंदार शिरसाट यांच्या घराच्या खळ्यात बैठक होणार आहे.
तर दौऱ्याच्या दुसऱ्या दिवशी, अर्थात शुक्रवार, 24 नोव्हेंबर रोजी दुपारी दीड वाजता कुडाळ बांबार्डे येथे स्नेहा दळवी यांच्या घराच्या खळ्यामध्ये आदित्य ठाकरे हे सर्वांशी संवाद साधणार आहेत. त्यानंतर दुपारी 3 च्या सुमारास ते पत्रकार परिषदेला संबोधित करणार आहेत. आणि सायंकाळी 4 वाजता कणकवली येथून राजापूरला प्रयाण करतील, असे युवासेनेकडून कळवण्यात आले आहे.
लोकसभा निवडणुकींचा आढावा घेणार
लोकसभा निवडणुकीच्या पार्श्वभूमीवर आदित्य ठाकरे यांचा हा दौरा अत्यंत महत्त्वाचा मानला जात आहे. या दौऱ्यात आदित्य ठाकरे लोकसभा मतदारसंघांचा आढावा घेणार आहेत. तसेच विधानसभा मतदारसंघांचाही आढावा घेणार आहेत. याशिवाय पदाधिकाऱ्यांशी संवाद साधून त्यांना निवडणुकीचा कार्यक्रम दिला जाणार असल्याचं सांगितलं जात आहे. नारायण राणे यांच्या बालेकिल्ल्यातच आदित्य ठाकरे येणार असल्याने या दौऱ्याकडे सर्वांचं लक्ष लागलं आहे.
नितेश राणेंचे आदित्य ठाकरेंवर टीकास्त्र
दरम्यान भाजपा आमदार नितेश राणे यांनी आदित्य ठाकरेंच्या सिंधुदुर्ग दौऱ्यावरही त्यांनी टीका केली. “फिल्म फेस्टिवल आणि सिंधुदुर्ग जिल्ह्यात खळा बैठका ह्याच काय साम्य आहे. सिंधुदुर्ग तो बहाना है. पेंग्विनको गोवा मे बॉलिवूड के Actors के साथ नाचना है” अशा शब्दात त्यांनी टीकास्त्र सोडलं.
