Amit Thackeray : अमित ठाकरेंच्या कल्याण-डोंबिवली दौऱ्याआधी मनसेचा अंतर्गत वाद चव्हाट्यावर, नेमकं काय घडलं?

मनसेचे युवा नेते अमित ठाकरे कल्याण-डोंबिवलीचा दौरा करणार आहेत. या दौऱ्याच्या पार्श्वभूमीवर मनसेने झेंडे-बॅनरबाजीच्या माध्यमातून मोठं शक्तीप्रदर्शन केलं आहे. या बॅनरवर पक्षातील सर्व नेतेमंडळीचे फोटो पाहायला मिळत आहेत. परंतु पक्षाच्या जिल्हाध्यक्षांचा फोटो गायब असल्याचे समोर आलं आहे. या फोटो पॉलिटिक्समुळे पक्षातील अंतर्गत वाद चव्हाट्यावर आला आहे.

मिळालेल्या माहितीनुसार, अमित ठाकरे कल्याण-डोंबिवली दौऱ्यावर येणार आहेत. अमित ठाकरे हे कल्याण-डोंबिवलीत विद्यार्थ्यांशी संवाद साधणार आहेत. तसेच सदस्य नोंदणी आणि कॉलेज युनिटचे उद्घाटन अमित ठाकरेंच्या हस्ते होणार आहे. या दौऱ्याआधी शहरभर मनसेचे झेंडे आणि मोठमोठे बॅनर लावून जोरदार शक्तिप्रदर्शन केले आहे. मनसे माजी आमदार कल्याण शहराध्यक्ष प्रकाश भोईर यांच्या स्वागत बॅनरवर अमित ठाकरेंसह इतर पदाधिकाऱ्यांचे फोटो आहेत. मात्र जिल्हाध्यक्ष उल्हास भोईर याचा फोटो गायब आहेत . जिल्हाध्यक्षांचा फोटो गायब असल्याने मनसेच्या गोटात ‘फोटो पॉलिटिक्स’ची जोरदार चर्चा सुरू झाली आहे.

जाणीवपूर्वक फोटो टाळला की अनवधानाने राहिला, याबाबत मनसेकडून अद्याप अधिकृत स्पष्टीकरण नाही. मात्र अमित ठाकरेंच्या दौऱ्याआधी शक्तिप्रदर्शनासोबतच मनसेतील अंतर्गत राजकारणही चर्चेत आलं आहे. अमित ठाकरेंच्या दौऱ्यात मनसेची ताकद दाखवण्याची तयारी दिसून येत आहे. मात्र बॅनरबाजीमुळे अंतर्गत समीकरणे पुन्हा चव्हाट्यावर आली आहे.

ब्रिजभूषण सिंगच्या समर्थनावरून भाजप-मनसेत वाद

काही दिवसांपूर्वी कल्याण डोंबिवलीत ब्रिजभूषण सिंग यांच्या समर्थनावरून भाजप मनसे वाद पेटला. ब्रिजभूषण सिंगला सलाम, राज ठाकरे एकदाही उत्तर प्रदेशला गेले नाहीत. हे उत्तर भारतीय आहेत, गरिबांना तर कोणीही मारू शकतात, असं म्हणत भाजप जिल्हाध्यक्ष नंदू परब यांचा ब्रिजभूषण सिंग यांचं कौतुक करत राज ठाकरेंचा एकेरी उल्लेख केला. तर डोंबिवलीत सर्व एकत्र आहेत. वातावरण खराब करू नका. तुमची राज ठाकरेंवर बोलण्याची औकात नाही. अनधिकृत बांधकामांसाठी उत्तर भारतीयांची हुजरेगिरी करतात. टोळी घेऊन फिरणाऱ्यांनी साहेबांचे नाव घेऊ नये, अशा शब्दात मनसे शहराध्यक्ष हर्षद पाटील यांनी भाजपच्या नंदू परब यांना सुनावले.